विराटनगर – झापा र मोरङ जिल्लामा भएको सवारी दुर्घटनामा २ जनाको मृत्यु भएको छ ।

झापाको भद्रपुर नगरपालिका–५ स्थित मेची पुलमा मंगलवार ट्याक्टरले किचेर १ बालिकाको मृत्यु भएको छ । भद्रपुरबाट मेची खोलातर्फ जाँदै गरेको मे१त ५२३० नम्बरको ट्याक्टरमा सवार ५ वर्षीया राखी यादवको मृत्यु भएको जिल्ला प्रहरी कार्यालय झापाले जनाएको छ ।

बुवासँग छठ पर्वको मेला हेर्न जाने क्रममा ट्याक्टरबाट ओर्लदै गरेको अवस्थामा ट्याक्टर पछाडि गुड्दा बालिकालाई चक्काले किचेको थियो । चक्काले किचेर गम्भीर घाइते बालिकालाई उपचारको लागि ओमसाई पाथिभरा अस्पताल भद्रपुर पठाइएकोमा उपचारको क्रममा सोही अस्पतालमा मृत्यु भएको हो भने ट्याक्टर र चालकलाई प्रहरीको नियन्त्रणमा राखिएको जिल्ला प्रहरी कार्यालय झापाले जनाएको छ ।

मोरङको बेलबारी नगरपालिका–४ बेतनामा लहरीको ठक्करबाट मोटरसाइकलमा सवार १ जनाको मृत्यु भएको छ । पूर्वपश्चिम राजमार्गमा पूर्वबाट पश्चिमतर्फ आउँदै गरेको एचआर ४६ सी ७८७६ नम्बरको भारतीय गाडीले विपरीत दिशाबाट जाँदै गरेको को२०प ६७०२ नम्बरको मोटरसाइकललाई ठक्कर दिएको थियो ।

ठक्करबाट मोटरसाइकलमा सवार सुनसरी बराह नगरपालिका–४ बस्ने १९ वर्षीय आर्यन चौधरीको घटनास्थलमा नै मृत्यु भएको इलाका प्रहरी कार्यालय बेलवारीले जनाएको छ ।