म्याग्दी– नेकपाका अध्यक्ष पुष्पकमल दाहाल प्रचण्डले पत्नी सीता दाहालको उपचारका लागि आफू म्याग्दीको तातो पानीमा डुबुल्कि लगाउन आएको बताएका छन् । 

‘प्राकृतिक तातो पानीले राम्रो गर्छ भन्ने उनलाई विश्वास भयो’ प्रचण्डले भने,‘कसैले तातोपानीमा राम्रो हुन्छ भनेछ अनि तातोपानी जाउँ भनिन् ।’

तातोपनीको तीन दिनको बसाइँबारे आफूले प्रधानमन्त्री केपी ओलीलाई भनेको र गृहमन्त्रीसँगको कुराकानीपछि आफू आएको बताए । 

आफ्नो तीन दिनको निजी भ्रमणले म्याग्दीको विकास र पर्यटनमा फाइदा पुग्ने प्रचण्डको विश्वास थियो । 

आफ्नो तीन दिने तातोपानी बसाइले म्याग्दीको तातोपानीको चर्चा राष्ट्रिय र अन्तर्राष्ट्रिय भएको भन्दै प्रचण्डले अब आन्तरिक र वाह्य पर्यटकको संख्यामा बृद्धि हुने दाबी गरे । 

आफूहरुलाई तातोपानीमा देख्दा त्यहाँ आउने बिरामी समेत उत्साही भएको प्रचण्डको भनाइ छ । आफू नीजि भ्रमणका लागि आएको भए पनि भ्रमण नीजि हुन नसकेको प्रचण्डको गुनासो थियो । 

‘निजी भ्रमण भनिएपनि सार्वजनिक व्यक्तित्व भएपछि निजी नहुँदो रहेछ,’प्रचण्डले भने,‘सिंगापुर गएर पनि मान्छेले सुख दिँदैनन् त्यो पनि निजी हुँदैन ।’