काठमाडौं — साउदी अरबबाट धार्मिक यात्रा उमरा गरेर फर्किरहेको एक भारतीय परिवारका चार वर्षे छोरालाई विमानमै छारेरोग लागेपछि मृत्यु भएको छ ।

खलीज टाइम्स पत्रिकामा छापिएको समाचारअनुसार, ओमान एयरवेजको विमान उडेको ४५ मिनेटपछि याहया पुथीयापुरायिल नामक बालकलाई छारेरोगले समात्यो । 

दुबईमा बस्ने बालकका एक नातेदारले बताएअनुसार, जेद्दाबाट हिँड्दा बच्चोलाई हलुका ज्वरो आएको थियो र हवाईयात्राकै बेलामा छारेरोग लाग्यो । आमाकै काखमा बच्चो छटपटिएर म¥यो । 

विमान जेद्दाबाट केरलको कोझीकोड गइरहेको थियो । यो दुःखद घटना भएपछि विमानलाई सोमवार दिउँसो अबुधाबीमा आपतकालीन परिस्थितिमा अवतरण गराइयो । 

बालक अपांग रहेको र ऊ हिँडडुल गर्न अनि बोल्न नसक्ने बताइएको छ । उसलाई ह्वीलचेयरबाट नै ल्याइएको र जन्मेदेखि नै उपचार चलिरहेको बताइएको छ । 

बच्चो आमाबुवासमेत १३ जनासँग तीर्थयात्रा गएको हो । 

उमरा भनेको मक्काको धार्मिक यात्रा हो । मुसलमानहरूले कुनै पनि समयमा यो यात्रा गर्छन् । 

बच्चाको शवलाई मंगलवार एत्तिहाद एयरलाइन्सबाट भारत पठाइयो । कन्नूर पुगेपछि लाश गाडिएको हो ।

एजेन्सी