काठमाडौं — अमेरिकाको एक संसदीय प्यानलले अमेरिका सुरक्षा तथा सैन्य संकटको सामना गरिरहेको चेतावनी दिएको छ । 

युद्ध भएमा रुस र चीनले अमेरिकालाई हराउन सक्ने प्यानलले बुधवार चेतावनी दिएको हो । 

कंग्रेसले नेसनल डिफेन्स स्ट्य्राटेजी कमिसनलाई डोनल्ड ट्रम्पको राष्ट्रिय सुरक्षा रणनीति अध्ययन गर्न भनेको थियो । यो रणनीतिबाट नै अमेरिकाले चीन र रुससँग शक्ति सन्तुलन बनाउन सक्छ । 

स्ट्य्राटेजी कमिसनमा अनेकौं पूर्व डेमोक्रेटिक र रिपब्लिकन अधिकारीहरू छन् । उनीहरूका अनुसार, अमेरिकी सेनाको बजेटमा कटौती गरिएको छ । सैनिकहरूले पाउने सुविधामा कमी आएको छ । अनि चीन र रुसजस्ता देश अमेरिकाको शक्ति कम गर्ने कोशिश गरिरहेका छन् । 

कमिसनका अनुसार, अमेरिकाको सेनाले नै उसलाई संसारमा सबभन्दा शक्तिशाली बनाएको छ । तर अहिले उसको सैन्यशक्ति कमजोर भएको छ । एक्काईसौं शताब्दीमा अमेरिकाको बढी ध्यान आतंकवादविरोधी अभियानमा
केन्द्रित छ । त्यसले गर्दा अमेरिकाको क्षेप्यास्त्र प्रतिरक्षा, साइबरस्पेस अपरेसन अनि जमीन र पनडुब्बीबाट हुने आक्रमण रोक्ने क्षमतामा कमी आएको छ । 

संसदीय प्यानलको रिपोर्टमा भनिएको छ, ‘एसिया र युरोपमा अमेरिकी प्रभाव कम भएको छ । सैन्य सन्तुलन पनि परिवर्तन भएको छ । त्यसले गर्दा युद्धको जोखिम बढेको छ । भविष्यका लडाईंमा अमेरिकी सेनाले धेरै हानि बेहोर्नुपर्ने
हुन्छ । रुस र चीनसँगको युद्ध अमेरिकाले जित्न पनि सक्छ, हार्न पनि सक्छ । अमेरिकाले दुई वा तीन मोर्चामा एकैसाथ लड्नुपर्ने पनि हुन सक्छ ।’

यो वर्ष पेन्टागनले सेनाका लागि लगभग ८० लाख करोड रुपैयाँको बजेट घोषणा गरेको छ । यो रुस र चीनको संयुक्त बजेटभन्दा पनि बढी हो । 

कमिसनका अनुसार, अमेरिकाले आफ्नो लक्ष्य हासिल गर्नका लागि यो बजेट अझै पनि कमै हो । डिफेन्स बजेटमा वर्षैपिच्छे तीनदेखि पाँच प्रतिशत वृद्धि गर्न सिफारिश गरिएको छ । 

एजेन्सी