महेन्द्रनगर – बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तको न्यायको लागि अनिश्चितकालीन धर्नामा बसेका उनका बुवाआमाको स्वास्थ्य अवस्था बिग्रेको छ ।

हत्या भएको १ सय १२ दिन बितेपनि हत्यारा पत्ता नलागेपछि जिल्ला प्रशासन कार्यालय कञ्चनपुर अगाडि धर्नामा बसेका निर्मलाका बुवाको स्वास्थ्य अवस्था बिग्रेको हो । उनका आफन्तसहित स्थानीयले अपराधी सार्वजनिक गर्नुपर्ने माग राख्दै कात्तिक २५ गतेदेखि धर्नामा बसेका हुन् ।

लगातार ५ दिनदेखि भोकभोकै धर्नामा बसेका निर्मलाका बुवाआमाको स्वास्थ्य अवस्था बिग्रेपछि बिहीवार महाकाली अञ्चल अस्पतालका चिकित्सकको टोलीले धर्नास्थलमै पुगेर स्वास्थ्य परीक्षण गरेको थियो । निर्मलाका बुवा यज्ञराज, आमा दूर्गा र कान्छीआमा लक्ष्मीको स्वास्थ्य परीक्षण गरिएको हो ।

महाकाली अञ्चल अस्पतालका डा. किशोर बोहराले तीनै जनाको स्वास्थ्य अवस्थामा खराब हुँदै गएको जानकारी दिए । उनका अनुसार बुवा यज्ञराजको ‘ब्लड प्रेसर’ कम हुँदै गएको छ । खाना कम खाने भएकाले यज्ञराजको स्वास्थ्य अवस्था कमजोर बन्दै गएको डा. बोहराले बताए । 

डा. बोहराका अनुसार यज्ञराजको घाँटीमा समेत समस्या देखिएको छ । रगत परीक्षणको रिपोर्ट आएपछि उनलाई थप उपचारका लागि अस्पतालमै लैजाने वा धर्नास्थलमै उपचार गर्नेबारे पछि मात्रै थाहा हुने बताइएको छ ।

उनकी आमाको ‘ब्लड प्रेसर’ कम र कान्छी आमाको बढी भएको देखिएको छ । उनीहरू दुवैको पनि स्वास्थ्य अवस्था कमजोर भएको छ । खाना कम खाने, चिसोमा अनसन बस्ने र कम सुत्ने गरेका कारण तीनै जनाको स्वास्थ्य अवस्था बिग्रेको चिकित्सकको भनाई छ ।

निर्मलाका परिवारजनले न्याय नपाउन्जेलसम्म धर्ना जारी राख्ने अडानमा छन् । निर्मलाकी आमा दूर्गाले स्वास्थ्य अवस्था बिग्रेपनि धर्ना नतोड्ने बताइन् । कञ्चनपुरका प्रमुख जिल्ला अधिकारी तारानाथ अधिकारी सहितका सुरक्षा प्रमुखले समेत पन्त परिवारको स्वास्थ्य अवस्थाबारे जानकारी लिएका थिए ।