काठमाडौं — ब्रेक्जिटका विषयमा प्रधानमन्त्रीसँग मतभेद भएपछि बेलायती सरकारका दुई मन्त्रीले राजीनामा दिएका छन् । 

ब्रेक्जिट सेक्रेटरी डोमिनिक राबले युरोपेली संघसित बेलायतले गरेको मस्यौदा ब्रेक्जिट सम्झौतालाई समर्थन गर्न नसक्ने भन्दै राजीनामा दिएका हुन् ।

प्रधानमन्त्री टेरिजा मेले बुधवार बेलुका उक्त सम्झौतामा आफ्नो मन्त्रिपरिषद्को समर्थन रहेको घोषणा गरेकी थिइन् । 

तर कैयौं मन्त्रीहरूले त्यसविरुद्ध बोलेको बुझिएको छ ।

राबले राजीनामा दिएको एक घन्टापछि वर्क एन्ड पेन्सन्स मन्त्री एस्थर मक्वेले पनि राजीनामा दिएकी छन् । 

अनि कन्जर्भेटिभ पार्टीका केही सांसदहरूले मेविरुद्ध अविश्वासको प्रस्ताव ल्याउने सुझाव समेत दिएका छन् । 

त्यसैगरी नर्दर्न आयरल्यान्ड अफिसका एक मन्त्री शैलेश भाराले पनि राजीनामा दिएका छन् ।

शिक्षामन्त्रीकी एक सहयोगी एन–मारी ट्रेभेल्यानले पनि राजीनामा दिएकी छन् ।

ब्रेक्जिट पक्षधर कन्जर्भेटिभ सांसद एन मारी मोरिसले प्रधानमन्त्रीविरुद्ध अविश्वासको प्रस्ताव सम्बन्धी पत्र धेरै सांसदले बुझाएको र अब नेतृत्वका लागि संघर्ष हुने बताइन् । 

उनले नयाँ प्रधानमन्त्री नियुक्त गर्नका लागि अनि ब्रेक्जिटको दिशा परिवर्तन गर्नका लागि प्रशस्त समय रहेको बताइन् भनिन्, ‘अहिले टेरिजा मेले नेतृत्व लिने समय होइन ।’

युरोपेली भन्सार नियम मान्ने गरी ब्रेक्जिट गराउने प्रधानमन्त्री मेको प्रस्तावलाई ब्रेक्जिट पक्षधरहरूले अस्वीकार गरेका हुन् । उनीहरू यसो हुँदा युरोपेली भन्सार नियममा बेलायत बाँधिने त्यसैले यो अस्वीकार्य भएको तर्क राख्छन् ।

एजेन्सी