विराटनगर– एक नम्बर प्रदेशका प्रदेश प्रमुख गोविन्द तुम्बाहाङ्गले विराटनगरमा भइरहेका विकास निर्माणका विषयमा चासो देखाएका छन् । विराटनगर महानगरका मेयर भीम पराजुलीलाई प्रदेश प्रमुखले आफ्नै कार्यालयमा बोलाएर विराटनगरको विकास र भइरहेका गतिविधिका विषयमा जानकारी लिएका हुन् । 

विराटनगर अस्थायी राजधानी र ऐतिहासिक शहर भएकाले विराटनगरमा के हुँदैछ भनेर आफूले बुझ्न खोजेको मेयरसँग तुम्बाहाङले भनेका थिए । मेयर पराजुलीसँगको भेटका क्रममा प्रदेश प्रमुख तुम्बाहाङ्गले भने, ‘विराटनगरलाई नमुना शहर बनाउनुहोस्, यसको मोडल १ नम्बर प्रदेशभरी लान सकियोस् ।’ मेयर पराजुलीले विराटनगर विकासको बाटोमा अगाडी बढी रहेको जानकारी गराएको उनको नीजी सचिवालयले जनाएको छ ।

विराटनगर महानगर भित्र भ्यू टावर, विराट राजाको दरवार, ४ सय किलोमिटर सडक पिच गर्ने काम, बैकल्पिक मार्गको विस्तार (घोगाह पैनी र ढाट देखि रानीसम्मको नहर छेउको बाटो) निर्माण, बसपार्क निर्माण, स्वच्छ खानेपानीकालागि जाईका सँगको सहकार्य भइरहेको बारेमा मेयरले जानकारी गराएका थिए । मेयर पराजुलीले खेलकुद विकासका लागि खेलमैदान र फ्रडलाइट लगाउने र अन्य  जनमैत्री कार्यक्रम अगाडी बढि रहेको जानकारी गराएका थिए ।  विकासका गतिविधिबारे सुन्दै प्रदेश प्रमुख तुम्बाहाङ्गले प्रदेश नं १ नमूना बन्ने आफ्नो अपेक्षा रहेको बताए ।