काठमाडौँ – २०७१ मंसिरमा भारतीय प्रधानमन्त्री नरेन्द्र मोदी र तत्कालीन प्रधानमन्त्री सुशील कोइराला सिंहदरबारभित्र सँगै थिए । मार्बलमा कुँदिएको थियो, नेपाल प्रहरीका लागि काभ्रेको पनौतीमा भारतले निर्माण गर्ने प्रहरी प्रतिष्ठानको शिलान्यास ।

पनौती पुग्न समयाभाव भएपछि सिंहदरबारभित्रै शिलान्यास गरिएको उक्त मार्बल अहिले त्यहाँ छैन । उक्त शिलान्यास उद्घाटनको तारतम्य मिलाउन खटिएका एक उच्च प्रहरी अधिकारीका अनुसार उद्घाटनलगत्तै महाराजगन्जस्थित प्रहरी प्रतिष्ठान पुर्‍याइएको उक्त मार्बल त्यहीँ थन्क्याइएको छ ।

भारतीय प्रधानमन्त्री मोदीले २०७१ मंसिर ९ मा अनुदान सहयोगमा प्रहरी प्रतिष्ठान बनाइदिने सम्झौतामा हस्ताक्षर गरेका थिए । त्यसका लागि ८ अर्ब ७९ करोड १३ लाख ८० हजार रुपैयाँ अनुदान सहयोग दिने सम्झौता थियो । काम सुरु भएको चार वर्षमा सबै संरचना तयार हुने सम्झौतामा उल्लेख छ ।

दुई देशका उच्च अधिकारीको होमवर्कपछि दुई देशका प्रधानमन्त्रीले सम्झौतामा हस्ताक्षर गरेको झन्डै पाँच वर्ष भइसक्यो ।

प्रहरी प्रवक्ता एसएसपी उत्तमराज सुवेदीका अनुसार अहिले भारतीय परामर्शदाताबाट गुरुयोजना निर्माणको काम भइरहेको छ । भौगोलिक बनोटका लागि डिजिटल सर्भे र माटो परीक्षणको काम भने सम्पन्न भइसकेको छ । २५ दशमलव ४५ हेक्टरमा फैलिएको पनौतीस्थित प्रहरीको जग्गामा प्रहरी प्रतिष्ठान कहिले निर्माण भइसक्ने हो, कसैलाई पत्तो छैन । कान्तिपुर दैनिकमा खबर छापिएकाे छ ।