बुटवलमा गाडी गुडाउँदा ख्याल गर्नुस्, परिएला ट्राफिकको फन्दामा

मंसिर १, २०७५

बुटवल – ५ नम्बर प्रदेशको अस्थायी राजधानी बुटवलमा ‘हर्न’ निषेध गरिएको छ ।

सवारीको चापका मुख्य शहरमा ध्वनि प्रदूषण बढेको गुनासो आएपछि बुटवललाई शनिबारदेखि लागू हुने गरी हर्न निषेधित क्षेत्र घोषणा गरिएको हो ।


ADVERTISEMENT

बुटवल उपमहानगर र ट्राफिक प्रहरी कार्यालय ५ नम्बर प्रदेशको संयुक्त प्रयासमा पहिलो चरणमा बुटवललाई हर्न निषेधित क्षेत्र घोषणा गरिएको हो । प्रदेश कार्यालयले ३ वटा उपमहानगरपालिकामा (बुटवल, घोराही र नेपालगञ्जमा) हर्न निषेध गर्ने योजना बनाएको छ ।

प्रदेशको केन्द्र तोकिएसँगै बुटवलमा सवारीको चाप बढेका कारण ध्वनि प्रदूषण बढेको छ । ट्राफिक प्रहरी प्रदेश कार्यालयका प्रमुख प्रहरी उपरीक्षक गणेश चन्दले हर्न बजाउँदा ध्वनि प्रदूषण भएकाले हर्न निषेधित क्षेत्र घोषणा गर्नुपरेको बताए । बुटवलमा सवारी साधनको चाप अत्याधिक छ । 

बुटवलको तिनाउ पुलदेखि गोलपार्क, राजमार्ग चौराह हुँदै बेस क्याम्पसम्मको नगरको एरियामा शनिवारदेखि हर्न निषेधित क्षेत्र घोषणा गरिएको छ । १ महिना सचेतना अभियान चलाइने छ भने त्यसपछि अटेर गर्नेलाई कारवाही गरिने छ ।

‘ध्वनि प्रदूषणबाट उत्पन्न हुने समस्याको निदान गर्न प्रथमतः हर्न नियन्त्रण, सडकको स्तरोन्नति र ट्राफिक चेतना प्रवाह गर्न जरुरी छ,’ प्रहरी उपरीक्षक चन्दले भने, ‘मानव स्वास्थ्य र भविष्य हाम्रो सबैभन्दा ठूलो सम्पत्ति हो ।’ धेरै सवारीले हर्न बजाउने हुँदा कुन साधनले बजाइरहेको छ भनेर थाहा पाउन पनि गाह्रो हुने गरेको ट्राफिक प्रहरी चन्द्र थापा बताए । 

यसअघि ट्राफिक प्रहरीले ध्वनि प्रदूषण नियन्त्रण गर्न ‘प्रेसर’ हर्न प्रयोग नगर्न अनुरोध गरेपनि नियन्त्रण हुन सकेको छैन । विद्यालय, अस्पताल लगायतका केही क्षेत्रलाई हर्न निषेधित तोकिएको छ । तर सवारी चालकले त्यसको पालना गरेका छैनन् । विषेशज्ञका अनुसार शहरी भागमा सवारी साधनले सय डेसिबलसम्मको ध्वनि प्रदूषण गरिरहेको छ । तर मानिसले ६० डेसिबलसम्मको ध्वनि मात्र सुन्न सक्छन् । ८० डेसिबलसम्मको ध्वनिले मानिसको ज्यानसमेत जानसक्ने विषेशज्ञ बताउँछन् ।

नेपालमा ध्वनि प्रदूषणका कारण १४ प्रतिशत मानिस बहिरोपनको समस्याबाट ग्रसित रहेको एक अध्ययनले देखाएको छ ।

मंसिर १, २०७५ मा प्रकाशित

प्रकाश आचार्य

प्रकाश आचार्य लोकान्तरका लागि ५ नम्बर प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस