विराटनगर – पूर्वउपप्रधान तथा अर्थमन्त्री भरतमोहन अधिकारीको विराटनगरमा शनिवार भव्य नागरिक अभिनन्दन गरिएको छ ।

विराटनगरलाई कार्यक्षेत्र बनाएर लामो समय बिताएका ८३ वर्षीय नेकपाका नेता अधिकारीलाई १ नम्बर प्रदेशका प्रदेश प्रमुख डा. गोविन्द तुम्बाहाङले अभिनन्दन गरेका हुन् ।

अन्तर्राष्ट्रिय ज्येष्ठ नागरिक दिवसको अवसर पारेर अधिकारीलाई नागरिक अभिनन्दन गरिएको हो । कार्यक्रमलाई सम्बोधन गर्दै प्रदेश प्रमुख तुम्बाहाङले नेपाली राजनीतिमा प्रतिवद्ध र ईमान्दार छवि भएका व्यक्तिको रुपमा अधिकारीलाई चित्रण गरे । 

प्रदेशका मुख्यमन्त्री शेरधन राईले अहिलेको अवस्थामा नेपाली राजनीतिको प्रेरणाको स्रोत अधिकारी भएकाले अधिकारीबाट आफूले धेरै सिक्न पाएको बताए । उनले २०६२÷६३ को जनआन्दोलन, संविधान निर्माणदेखि अहिलेसम्म आउँदा अधिकारीको योगदानलाई मुलुकले भुल्नै नसक्ने भन्दै प्रशंसा गरे । 

अभिनन्दनपछि समारोहलाई सम्बोधन गर्दै अधिकारीले इतिहास बोकेको विराटनगरलाई कसैले बिर्सन नहुने बताए । उनले यस्तो ऐतिहासिक ठाउँलाई प्रदेशको स्थायी राजधानी बनाएर प्रदेशलाई समृद्ध बनाउनुपर्ने बताए । आफूलाई अभिनन्दन गरिएकोमा खुसी भएका अधिकारीले मुलुकलाई समृद्धिको दिशामा लैजान सबै मिल्नुको विकल्प नभएको बताए ।

कोराइराला परिवारसँगको सम्बन्ध

२०४६ सालको राजनीति आन्दोलनअघि विराटनगरमा ल फर्म चलाएर बसेका अधिकारी २०४६ सालपछि पूर्णकालीन राजनीतिमा लागेका हुन् । २०४६ सालको जनआन्दोलनअघि विराटनगरमा राजनीतिक जागरण ल्याउन उनले भूमिका खेलेका थिए ।

नाताले स्व. कृष्णप्रसाद कोइरालाको भान्जा पर्ने अधिकारीले मातृकाप्रसाद कोइरालाका छोरा कमल कोइरालासँग मिलेर विराटनगरमा लामो समय ल फर्म चलाएका थिए । विराटनगरमा ल फर्म सञ्चालन गरेका बेला अधिकारी राजनीतिक मुद्दामा पक्राउ परेका व्यक्तिको पक्षमा बढी बहस गर्ने गर्दथे । 

अर्थमन्त्री हुँदाको योगदान

बहुदलीय आन्दोलनपछि मनमोहन अधिकारीको नेतृत्वमा बनेको ९ महिने कम्युनिस्ट सरकारमा भरतमोहन अधिकारी अर्थमन्त्रीको रुपमा थिए । उनी स्व. मनमोहन अधिकारीका भाई हुन् ।

ज्येष्ठ नागरिकलाई बृद्धभत्ता दिने कार्यको प्रारम्भ गर्न भूमिका खेलेका अधिकारी पछिल्लो समय राजनीति जीवनमा थोरै मात्र क्रियाशील छन् ।