काठमाडौं– आज साँझ बसेको काँग्रेस केन्द्रीय समिति बैठक निष्कर्षविहीन बनेको छ । पार्टी कार्यालय सानेपामा निर्धारित समय २ बजेभन्दा करीब ५ घण्टा ढिलो गरी सुरु भएको बैठक आइतबार दिउँसो २ बजे फेरि बस्ने गरी सकिएको हो । 

आजको बैठक करीब १० मिनेट बसेरै सकिएको थियो । बैठकमा आज कुनै विषयमा छलफल नभएको र भोलि नेविसंघको विषय र महासमिति बैठकलगायतका विषयमा छलफल हुने प्रवक्ता विश्वप्रकाश शर्माले जानकारी दिए । 

केन्द्रीय समिति बैठक बोलाइएसँगै शनिबार दिनभर पार्टी केन्द्रीय कार्यालय परिसरमा नेविसंघका कार्यकर्ताले विरोध प्रदर्शन गरेका थिए ।

तत्काल महाधिवेशनको गर्ने वातावरण निर्माण गरिनुपर्ने लगायतका माग राख्दै नेविसंघले विरोध प्रदर्शन गरेको हो । सो क्रममा सानेपा परिसर तनावग्रस्त समेत बन्न पुगेको थियो ।