काठमाडौँ–काठमाडौँ उपत्यकामा सञ्चालित माइक्रोबसका चालक तथा सहचालकले आजदेखि अनिवार्यरुपमा फ्लोरेसेन्ट ज्याकेट लगाउनुपर्ने भएको छ । 

महानगरीय ट्राफिक प्रहरी महाशाखा, नेपाल यातायात व्यवसायी राष्ट्रिय महासङ्घ र यातायात मजदुरको संयुक्त आयोजनामा आज न्यूरोड गेटबाट उक्त अभियानको निरन्तरता दिइएको हो । 

उपत्यकाका सबै रुटमा समेत रुट नम्बर र रुटको नामसमेत सवारी साधनमा राख्ने व्यवस्था आजैदेखि शुरु भएको छ । महाशाखाका तत्कालीन प्रहरी नायब महानिरीक्षक सर्वेन्द्र खनालको समयमा फ्लोरेसेन्ट ज्याकेट लगाउन शुरुआत गरे पनि प्राविधिक कारण सम्पूर्ण चालक र सहचालकले ज्याकेट लगाउन सकेका थिएनन् ।
 महाशाखाका प्रमुख एवं प्रहरी वरिष्ठ उपरीक्षक वसन्तकुमार पन्त अभियानले निरन्तरता पाएसँगै उपत्यकाभित्र दुर्घटना न्यूनीकरण हुने, चालक सहचालकमा अनुशासन कायम हुने र सवारी प्रयोगकर्ताले सहजै चालक र सहचालकको पहिचान गर्न सक्ने बताउँछन् । 

“चालक र सहचालकलाई ज्याकेट लगाएसँगै आचरण र व्यवहारमा परिवर्तन हुने र यात्रु र चालक सहचालकको सम्बन्धमा सुधार हुने विश्वास लिएका छौँ”, उनले भने । ठूला सवारी साधनका चालक तथा सहचालकलाई समेत क्रमशः ज्याकेट लगाउने व्यवस्था गर्ने उनले बताए । 

महासङ्घका महासचिव सरोज सिटौला ज्याकेटले चालकको पहिचान, रातिको समयमा चम्किलो देखिने र चालकका बारेमा सेवाग्राहीलाई केही गुनासो भए उजुरी गर्नसमेत सजिलो हुने बताउँछन् ।  “अभियानले चालक र सहचालकलाई मर्यादित र अनुशासन कायम गर्न मद्दत पुग्ने हुँदा अभियानको कार्यान्वयनका लागि नेपाल यातायात व्यवसायी राष्ट्रिय महासङ्घ लाग्नेछ”, उनले भने । 

नेपाल यातायात मजदुर सङ्घ क्षेत्रीय संयोजक जगन्नाथ गौतम, नेपाल यातायात स्वतन्त्र मजदुर सङ्गठनका अध्यक्ष भीमज्वाला राईलगायतले प्लोरोसेन्ट ज्याकेट लगाएसँगै यातायात मजदुरलाई अनुशासित बनाउन सिकाउने भएकाले मजदुर लगाउन प्रतिबद्ध भएको बताए । 

सोहीअनुसार हाल उपत्यकाका सम्पूर्ण ट्याक्सी चालकले प्लोरोसेन्ट ज्याकेट लगाउँदै आएका छन् । हाल काठमाडौँ उपत्यकाका १५ रुटमा एक हजार हाराहारीमा माइक्रोबस सञ्चालनमा रहेका छन् ।