सुर्खेत – कर्णाली प्रदेशमा रहेका तेस्रोलिङ्गीले आफूले परिवारमा बस्न पाउनुपर्ने माग गरेका छन् ।

सोमवार वीरेन्द्रनगरमा आयोजना गरिएको यौनिक तथा अल्पसंख्यक महासंघ काठमाडौंले आयोजना गरेको कार्यक्रममा उनीहरूले विवाहको माग जोडदार रुपमा उठाएका हुन् ।

तेस्रोलिङ्गी सिमरनले सरकारले आफूहरूलाई विवाह गर्ने, विवाह दर्ता गर्ने र बच्चा एडप्ट गर्ने अधिकार दिनुपर्ने बताइन । ‘म आफैं २ पटक आत्महत्याको असफल प्रयास गरी बाँचेकी थिएँ,’ विगत स्मरण गर्दै सिमरनले भनिन्, ‘समाजमा भएको विभेदका कारण मैले त्यो कदम त उठाएँ तर सफल हुन सकेन ।’

उनले अहिले पनि नेपाली समाजमा आफूहरूलाई हेर्ने दृष्टिकोणमा परिवर्तन नआएको दुखेसो पोखिन् । ‘भगवानको घरमा समय लिएर त आयौं तर नेपाली समाजको माया समय पाउन सकेनौं,’ उनले भनिन् । आफूहरूलाई भगवानले बेग्लै रुपमा बनाएको बताउँदै राज्यले नै आफूहरूलाई उपेक्षा गरेको आरोप लगाइन् ।

‘हामीलाई आर्थिक अधिकार चाहियो । संविधानमा व्यवस्था गरे अनुरुपको अधिकार हामीले प्रयोग गर्न पाउनुपर्छ,’ उनले भनिन्, ‘हामी कहिलेसम्म घरपरिवारबाट टाढा हुने ? कि हामी मानिस नै होइनौं ? के हाम्रा लागि संविधान बनेको होइन ?’

तेस्रोलिङ्गी पिटरले आफूहरूले राज्यबाट रोजगारीका लागि आरक्षण पाउनुपर्ने माग गरे । करीब देशभर ७ लाख तेस्रोलिङ्गी समुदाय रहेको बताउँदै उनले समुदायको उत्थान, संरक्षण र विकासका लागि सबै तहका सरकार सकारात्मक हुनुपर्ने र नयाँ कानून बनाउँदा स्थानीय र प्रदेश सरकारले आफूहरूको राय लिनुपर्ने बताए ।

कार्यक्रमलाई सम्बोधन गर्दै वीरेन्द्रनगर नगरपालिकाका उपप्रमुख मोहनमाया ढकालले आफूहरूले आवश्यक नीति बनाउँदा तेस्रोलिङ्गी समुदायको भावना पनि समेट्ने बताइन् । ‘राज्यले सबै नागरिक बराबर हुन् भनेको छ,’ उनले भनिन्, ‘सोही बमोजिमा हामी तपाईहरूका लागि आवश्यक पर्ने नीति नियम, कानून संशोधन गर्न तयार छौं ।’