धनगढी– युवक हत्यामा संलग्नलाई उन्मुक्ति दिने प्रयास भएको भन्दै विरोध स्वरुप आह्वान गरिएको आमहड्तालले धनगढी आज बिहानैदेखि अशान्त बनेको छ । गत शुक्रबारराति धनगढी उपमहानगरपालिका–४ का ३० वर्षीय विजय थापाको हत्यामा संलग्नलाई उन्मुक्ति दिन खोजिएको भन्दै स्थानीयले संघर्ष समिति नै गठन गरेर आह्वान गरेको हड्तालले धनगढी अशान्त बनेको हो ।

बन्दकर्ताले विहानैदेखि धनगढी बजार बन्द गराउँदै हिडेका छन् । तर लामो तथा छोटो दूरीका सवारी साधन चलिरहेको जिल्ला प्रहरी कार्यालय कैलालीका प्रहरी नायव उपरिक्षक हरि ओलीले जनाए । बन्दकर्ताले घटनाको विरोध गर्दै सोमबार धनगढीमा प्रदर्शन समेत गरेका थिए ।

प्रहरीले घटनास्थलबाट थापाको शव घिसार्दै गरेको अवस्थामा उपमहानगरपालिका–४ कै आशिष सेठीलाई पक्राउ गरेको थियो । सेठी विरुद्ध कर्तव्य ज्यान मुद्दा दर्तापछि प्रहरीले थप अनुसन्धानको लागि जिल्ला अदालत कैलालीबाट म्याद थप गरी अनुसन्धान बढाएको छ ।

तर मृतक थापाको हत्या नभई उनीहरू बसेको होटल कलशको छतबाट खसेर मृत्यु भएको भन्दै अभियुक्त सेठीले प्रारम्भिक बयान दिएपछि र थप संलग्नबारे प्रहरीले चासो नदिएको भन्दै पीडित परिवारले संघर्षमा उत्रेका हुन् ।
प्रहरी नायव उपरीक्षक ओलीले अभियुक्त नियन्त्रणमा रहेको र थप अनुसन्धान जारी रहेको अवस्थामा आन्दोलन गर्नुपर्ने अवस्था नरहेको बताए । आफूहरू घटनाबारे सुक्ष्म अनुसन्धान गरिरहेको बताउँदै उनले हत्यारा कुनै पनि हालतमा उन्मुक्ति नपाउने बताए । 

मृतकका परिवारले शव बुझ्न मानेका छैनन् । शव सेती अञ्चल अस्पतालमा रहेको छ । प्रहरीका अनुसार मृतक थापा र अभियुक्त सेठी लागूऔषधका प्रयोगकर्ता एवं कारोबारी हुन् । उनीहरूविरुद्ध जिल्ला प्रहरी कार्यालय कैलालीमा उजुरी समेत परेको प्रहरीको तथ्यांकमा उल्लेख छ ।