काठमाडौं – राष्ट्रिय जनता पार्टीले अध्यक्ष मण्डलका संयोजक परिवर्तन गरेको छ ।

काठमाडौंको बबरमहलस्थित केन्द्रीय कार्यालयमा मंगलवार बसेको अध्यक्ष मण्डलको बैठकले चक्रीय प्रणालीमार्फत् संयोजक चुनिने निर्णय गर्दै राजेन्द्र महतोलाई संयोजक बनाउने निर्णय गरेको हो ।

पार्टीले जारी गरेको विज्ञप्तिमा पार्टी नेतृत्व र कार्यकर्तालाई अनुशासनमा राख्नको लागि अध्यक्ष मण्डललाई चक्रीय प्रणालीमा ढालिएको उल्लेख छ । अध्यक्ष मण्डलको बैठकपछि जारी गरिएको विज्ञप्तिमा पार्टीको विधानबमोजिम राजेन्द्र महतोलाई संयोजक पदको दायित्व दिइएको लेखिएको छ । यसअघि महन्थ ठाकुरले अध्यक्ष मण्डलको संयोजकत्व गर्दै आएका थिए ।

संयोजक परिवर्तन गर्ने निर्णयसँगै राजपाले एकीकरणको समयमा निर्वाचन आयोगमा बुझाइएको केन्द्रीय कार्यसमितिको सूचीलाई आधिकारिक मान्दै त्यसपछिका नियुक्ति र मनोनयन सबै रद्द गर्ने निर्णय पनि गरेको छ ।