बुटवल – ५ नम्बर प्रदेशको स्थायी राजधानी र नामाकरणको लागि सुझाव संकलन गर्ने विशेष समितिको म्याद सकिएपछि बल्ल संयोजक चयन गरिएको छ ।

राजधानी र नामाकरण गर्ने समितिको म्याद २३ कात्तिकसम्म रहेपनि मंगलवारको समितिको बैठकले ४ महिनापछि संयोजक चयन गरेको हो ।

नेकपाका रोल्पाबाट निर्वाचित सांसद जितेन्द्रकुमार पुनलाई संयोजक बनाएको छ । भेगीय स्वार्थका कारण तानातानमा रहेको प्रदेशको स्थायी राजधानी र नामाकरण टुंग्याउने समितिले ढिलो गरी संयोजक तोकेको हो । तत्कालीन शेरबहादुर देउवा नेतृत्वको सरकारले प्रदेशको अस्थायी राजधानी बुटवल तोकेको थियो । 

निर्धारित ३ महिनामा समितिका २ वटा मात्र बैठक बसेका थिए । म्याद सकिएपछि बसेको बैठकले संयोजक तय गरेको छ । समितिले कार्यविधिउपर राय सुझाव राखेपछि कार्यविधिलाई अन्तिम रूप दिने तयारीमा रहेको बताइएको छ । समिति गएको साउन २४ गते प्रदेश सभाको दोस्रो अधिवेशनको अन्तिम दिने गठन गरिएको थियो ।

संयोजक तय गरेपनि समितिले सुझाव कसरी लिने भन्ने कार्यविधि बनाउन सकेको छैन । समितिको संयोजक तय गरेको जानकारी आफूहरूले सभामुख पूर्णबहादुर घर्तीलाई जानकारी गराएको समितिका सदस्य एवं नेपाली कांग्रेसका सांसद वीरबहादुर रानाले जानकारी दिए । समिति १५ सदस्यीय छ । 

समितिका सदस्य एव विष्णु पन्थीले भने समितिको म्याद नसकिएको दावी गरे । उनले भने, ‘समितिको पहिलो बैठकबाट ३ महिनाको समय हो । हाम्रो पहिलो बैठक भदौ ११ गते बसेको हो । ११ गतेबाट समय गन्ने हो ।’ उनले अर्को बैठक छिट्टै बसेर कार्यविधि टुंगो लगाई सुझाव संकलन शुरू गरिने बताए ।

प्रदेशको नामाकरण र राजधानी टुंग्याउने विषय पेचिलो बन्दै गएको छ । सुझाव संकनल गरिएपनि संविधानको धारा २८८ मा भएको व्यवस्थाअनुसार प्रदेशको नाम र स्थायी राजधानी सम्बन्धित प्रदेशसभाले निर्णय गरे बमोजिम हुने व्यवस्था छ । प्रदेशमा सत्तारूढ दलको दुईतिहाई सांसद ६० जना संसद छन् । मुख्यमन्त्रीसहित केही मन्त्री प्रदेश राजधानी दाङ लैजाने पक्षमा देखिन्छन् । पहाडका ६ जिल्ला र तराईका ६ जिल्ला मिलेर बनेको प्रदेश सभामा ८७ सांसद रहेका छन् ।