काठमाडौं — आजकलका आमाबुवा आफ्ना छोराछोरीको अनौठा नाम राख्न थालेका छन् । 

अमेरिकाको टेक्सासमा यस्तै किसिमको अनौठो नामले विवाद जन्माएको छ । एक महिलाले आफ्नी छोरीको नाम मजाकमा उडाइएकाले एयरलाइन्ससँग गुनासो गरेकी छिन् । 

ट्रेसी रेडफोर्ड नामक महिलाले आफ्नी छोरीको नामको मजाक विमानस्थल कर्मचारीले उडाएको भन्दै सामाजिक सञ्जालमा गुनासो पोखिन् । 

छोरीको नाम एबीसीडीई हो । 

ट्रेसी आफ्नी छोरीका साथ क्यालिफोर्नियाबाट टेक्सासको एल पासो जाँदैथिइन् । उनले भनिन्, ‘जोन वेन विमानीथलमा गेट एजेन्टले मेरी छोरीको नाम पढेर हाँस्दै मेरी छोरीतर्फ औंला देखाएर अन्य कर्मचारीसँग कुरा गर्न थाल्यो । मैले यो
देखेपछि सहन सकिनँ र उसलाई म तपाईंका कुरा सुन्छु र छोरीले पनि सुन्दैछे भनें । तपाईंले यो सब बन्द गर्नुस् पनि भनें ।’ 

महिलाले थपिन्, ‘अनि कुनै कर्मचारीले मेरो बोर्डिङ पासको तस्वीर खिचेर सामाजिक सञ्जालमा हाल्यो र मजाक उडायो । मलाई अन्य व्यक्तिबाट पोस्टका बारेमा थाहा भयो । मैले यो थाहा पाएपछि साउथवेस्ट एयरलाइन्ससँग गुनासो
गरें तर दुई हप्तापछि पनि एयरलाइन्सले कारावही चलाएन ।’

पछि चाहिँ एयरलाइन्सले महिलासँग माफी माग्यो ।

एजेन्सी