धनगढी – चौथौ मिस एण्ड मिस्टर सुदूरपश्चिमाञ्चल टुरिज्म् नेपालको उपाधि क्रमशः एलिशा गौतम र विवेक जोशीले जितेका छन् ।

अप इन्टरटेनमेन्ट इन्टरनेसनल प्रालिको आयोजना शनिवार राति सम्पन्न प्रतिस्पर्धामा उपाधिसँगै विजेता गौतमले स्कुटी र जोशीले मोटरसाइकल समेत प्राप्त गर्न सफल भएका हुन् ।

आयोजकका अनुसार प्रतियोगितामा महिला र पुरुषतर्फ फस्ट रनर अप क्रमशः जेनिफर वेद र प्रशान्त खड्का घोषित भए भने सेकेण्ड रनर अपको उपाधि असुति सिंह र सन्तोष ओझाले प्राप्त गरे ।

सो फाइनल प्रतिस्पर्धामा नेपाली फिल्म जगतका महानायक राजेश हमाल, नायिका सञ्चिता लुइँटेल, मिस एसिया प्यासिफिक चन्द्रा थापा गिरी, गोपाल सुन्दरलाल कक्षपतिले निर्णायकको भूमिका निर्वाह गरेको अप इन्टरटेनमेन्टका निर्देशक सारा थापाले जानकारी दिइन् ।

मिस एण्ड मिस्टर सुदूरपश्चिमाञ्चल टुरिज्मको अडिसन राउन्डमा ३ सयभन्दा बढीको सहभागिता भएकोमा फाइनलका लागि १३ केटी र १३ केटा गरी २६ जनाले प्रतिस्पर्धा गरेका थिए ।