कतार तेल निर्यातक देशको संगठनबाट अलग्गिने

मंसिर १७, २०७५

काठमाडौं — कतारले तेल निर्यातक मुलुकहरूको संगठन ओपेकबाट अलग्गिने निर्णय लिएको ऊर्जामन्त्री साद शेरिदा अल काबीले सोमवार घोषणा गरेका छन् । 

संसारभरिमा तेल उत्पादनको धेरै ठूलो हिस्सा यही संगठनले ओगटेको छ ।

तेल उत्पादन गर्ने १५ मुलुकहरूको समूहबाट अलग्गिने निर्णयलाई देशको सरकारी तेल कम्पनी कतार पेट्रोलियमले पुष्टि गरेको छ ।  

सन् २०१९ को पहिलो दिनदेखि लागू हुने गरी कतारले अलग्गिने निर्णय लिएको हो । 

दोहामा एक पत्रकार सम्मेलनमा बोल्दै अल काबीले भने, ‘संगठनबाट अलग्गिएर कतारले आफ्नो ध्यान प्राकृतिक ग्यास उत्पादन बढाउनमा लगाउनेछ । आगामी वर्षहरूमा प्रतिवर्ष ७७ मिलियन टनबाट ११० मिलियन टन उत्पादन गर्ने प्रयास रहनेछ ।’

तेल उत्पादक देशहरूको समूह त्याग्ने कतार पहिलो खाडी मुलुक हो । 

कतारले ओपेकको डिसेम्बर ६ मा हुने बैठकभन्दा ठीक अघि यो निर्णय लिएको हो । 

सन् २०१३ देखि कतारले तेल उत्पादन क्रमशः घटाउँदै लगेको छ । दिनको सात लाख २८ हजार ब्यारल उत्पादन गर्ने गरेकोमा सन् २०१७ मा आइपुग्दा ६ लाख ७ हजार ब्यारल प्रतिदिनमा उत्पादन झरेको छ । ओपेकको कुल
उत्पादनमा यो २ प्रतिशतभन्दा कम संख्या हो । 

सन् १९६१ मा ओपेक स्थापना भएको एक वर्षपछि कतारले सदस्यता लिएको थियो । 

अलजजीराबाट


ADVERTISEMENT

मंसिर १७, २०७५ मा प्रकाशित

प्रतिक्रिया दिनुहोस