काठमाडौं — फ्रान्समा इन्धनको मूल्यवृद्धिको विरोध गरिरहेका प्रदर्शनकारीहरू प्रधानमन्त्रीसँग मंगलवार हुने भनिएको वार्ताबाट पछि हटेका छन् । 

पहेंलो ज्याकेट आन्दोलनकारीहरूका केही सदस्यलाई उग्रपन्थी प्रदर्शनकारीले ज्यान मार्ने धम्की दिँदै सरकारसँग वार्ता नगर्न भनेपछि पछि हटेको बताए । 

विगत तीन हप्तादेखि इन्धनको मूल्यवृद्धिका विषयमा फ्रान्सका विभिन्न भागमा प्रदर्शन भइरहेका छन् । 

केही दिनयता प्रदर्शन हिंस्रक हुँदै गएको छ । अहिलेसम्म चारजनाको ज्यान गइसकेको छ ।

फ्रान्सका गृहमन्त्रीले आइतवारको प्रदर्शनमा लगभग एक लाख ३६ हजार मानिसले भाग लिएको जानकारी दिए । 

आन्दोलनको प्रचार सामाजिक सञ्जालमा तीव्र गतिमा भयो । राष्ट्पति इम्मानुएल म्याक्रोंका आर्थिक नीतिहरूको आलोचना बढ्दै गयो र विरोध प्रदर्शन चर्कियो । 

सरकारले विपक्षी दलहरूसँग आन्दोलन शान्त बनाउने विषयमा बैठक गरेको छ ।

विपक्षी नेता मरिन ला पें बैठकमा उपस्थित थिइन् । उनले विगत ५० वर्षमा आफ्नै जनतामाथि गोली चलाउने आदेश दिने म्याक्रों पहिलो नेता हुन लागेको बताइन् । 

फ्रान्सका अर्थमन्त्री ब्रुनो ले मायरले अघिल्लो हप्ता व्यापारमा भएको नोक्सानीको जानकारीका लागि व्यापार प्रतिनिधिसँग कुराकानी गरे । मायरले सरकार सार्वजनिक खर्च कटौतीका लागि प्रतिबद्ध रहेको बताए । 

बीबीसी हिन्दीबाट