काठमाडौं — इन्डोनेसियाको पूर्वी प्रान्त पापुआमा आइतवार बन्दूकधारीहरूले आक्रमण गर्दा २४ जना निर्माण कामदारहरू मारिएका छन् । 

उक्त हत्याकाण्डको अनुसन्धान गर्न गएको प्रहरी र सुरक्षाबलको टोलीमा रहेका एक सैनिकलाई पनि गोली हानेर मारिएको अधिकारीहरूले बताए । 

दुर्गम पहाडी क्षेत्र न्दुगामा कामदारहरू सडक र पुल बनाइरहेका थिए । 

प्रहरीले पृथकतावादी लडाकूहरू यो हत्यामा संलग्न रहेको बताएको छ । 

स्वतन्त्रताको माग राख्ने विद्रोहीहरू दशकौंदेखि पापुआमा सक्रिय छन् । 

बीबीसीकी रेबेका हेन्श्केका अनुसार, यो हत्याको पुष्टि भएमा उक्त अशान्त क्षेत्रमा विगत केही वर्षकै भएको सबभन्दा हिंस्रक घटना हुनेछ । 

सेनाका प्रवक्ता कर्नेल मुहम्मद ऐदीका अनुसार, डिसेम्बर १ मा सशस्त्र आपराधिक पृथकतावादी समूहले स्वतन्त्रता दिवस मनाउने गर्छन् र त्यसै अवसरमा उनीहरू एउटा समारोह आयोजना गरेका थिए । त्यसपछि उनीहरूले
हत्याकाण्ड गरे । 

निर्माण कम्पनी पीटी यस्तकाया कार्याका एक कामदारले उक्त समूहको तस्वीर खिचेपछि उनीहरू रिसाएर आक्रमण गरेको कर्नेल ऐदीले बताए । 

कामदारहरूको लाश उनीहरूले नै बनाइरहेको एक पुलमुनि भेटिएको उनले बताए । 

प्रहरी र सेनाका जवान सोमवार उक्त क्षेत्रमा अनुसन्धान गर्न आएको बेलामा उनीहरूमाथि गोली चलेको र एक सैनिकको मृत्यु भएको अनि अर्को घाइते भएको अधिकारीहरूले बताए । 

पापुआले सन् १९६१ मा नेदरल्यान्ड्सबाट आफू स्वतन्त्र भएको घोषणा गरेको थियो । तर त्यसको आठ वर्षपछि उसलाई इन्डोनेसियाले आफूमा मिसाएको थियो । 

दशकौंदेखि सामान्य किसिमको पृथकतावादी विद्रोह चलिरहेको छ तर फ्री पापुआ मुभमेन्टलाई छरिएको र साह्रौ कम हतियार भएको विद्रोही समूहका रूपमा वर्णन गरिएको छ । 

बीबीसीबाट