काठमाडौं — स्वास्थ्य क्षेत्रमा पहिलोपटक एक मृतक महिलाको गर्भाशय प्रत्यारोपण गरेर एक आमाले स्वस्थ बच्ची जन्माएकी छिन् । 

ब्राजिलमा यो शल्यक्रिया दुई वर्षअघि गरिएको भए पनि यसको जानकारी भर्खर आयो । ल्यान्सेट जर्नलमा प्रकाशित अनुसन्धान प्रतिवेलनमा लेखिएअनुसार, गर्भाशयको समस्या भएका महिलालाई यसबाट सहयोग हुने लेखिएको छ । 

सन् २०१३ मा स्विडेनमा पहिलोपटक जीवित महिलाको गर्भाशय प्रत्यारोपित गरिएको थियो । त्यसपछि दशपटक यस्ता शल्यक्रिया भएका छन् । 

जीवित महिलाबाट गर्भाशय भेट्न गाह्रो छ । त्यसैले चिकित्सकहरू मृत महिलाको युटेरस प्रयोग गर्ने प्रक्रियाको खोजी गरिरहेका थिए । 

वैज्ञानिकहरूका अनुसार, निःसन्तान हुने समस्याले कुल जनसंख्याको १५ प्रतिशतलाई सताउँछ । अनि ५०० मध्ये एक महिलालाई गर्भाशयको संरचना, गर्भाशय छेदन (हिस्टेरेक्टोमी) र संक्रमण हुन्छ जसले गर्दा गर्भधारणमा समस्या
आउँछ । 

साओ पाउलो विश्वविद्यालयका चिकित्सक दानी एजेनबर्ग भन्छन्, ‘निःसन्तान समस्याबाट सताइएका महिलाका लागि नयाँ विकल्प हाम्रो अनुसन्धानले दिएको छ । मरेपछि केही मानिस अंगदान गर्न चाहन्छन् । जिउँदै रहँदा दान गर्नेभन्दा
मरेपछि दान गर्ने धेरै भेटिन्छन् । जुन महिलाको गर्भाशय प्रत्यारोपण गरिएको हो, उनी दुर्लभ रोगको शिकार थिइन् ।’

महिलाको मृत्यु भएको १० घन्टाभित्र गर्भाशय निकालेर अर्की महिलामा प्रत्यारोपण गरियो । शरीरले नयाँ अंगलाई खारेज नगरोस् भनी एन्टीमाइक्रोबियल्स, एन्टी ब्लड क्लटिङ ट्रीटमेन्ट लगायत पाँच फरक फरक औषधि पनि दिइयो । 

पाँच महिनापछि शरीरले गर्भाशयलाई अस्वीकार गरेको कुनै पनि संकेत दिएन । महिलाको मासिक रजस्वला पनि नियमित भएको पाइयो । 

गर्भाशय प्रत्यारोपणको सात महिनापछि निषेचन गरिएका अण्डा प्रत्यारोपण गरियो । उनी गर्भवती भइन् र ३२ हप्तासम्म गर्भधारण सामान्य अवस्थामा रह्यो । 

अनि ३६औं हप्तामा महिलाले २.५ किलोकी बच्चीलाई सिजेरियन अपरेसनबाट जन्म दिइन् । 

एजेन्सी