सरकारी कागजात कीर्ते अभियोगमा मन्दिरका महन्थ पक्राउ

मंसिर २०, २०७५

जनकपुरधाम – सरकारी कागज कीर्ते गरेको आरोपमा पक्राउ परेका मन्दिरका महन्थ बैकुण्ठ दास वैष्णवलाई प्रहरीले सार्वजनिक गरेको छ ।

पक्राउ परेका महन्थ बैकुण्ठलाई जिल्ला प्रहरी कार्यालय धनुषाले बिहीवार पत्रकार सम्मेलनमार्फत् सार्वजनिक गरिएको हो ।


ADVERTISEMENT

प्रहरी उपरीक्षक (एसपी) गोविन्द थपलियाले उनलाई सार्वजनिक गर्दै सरकारी कागज कीर्ते गरेको आरोपमा पक्राउ गरी अनुसन्धान थालिएको बताए ।

जनकपुरधामको अत्यन्तै प्रमुख मठ मन्दिरमध्येका एक रत्न सागर मन्दिरका महन्थ बैकुण्ठलाई बुधवार काठमाडौंको बागबजारस्थित होटेल तिरुपतिबाट अपराध अनुसन्धान महाशाखाको सहयोगमा पक्राउ गरिएको एसपी थपलियाले बताए । उनलाई बिहीवार काठमाडौंबाट विमानमार्फत् १२ बजे जनकपुर ल्याइएको थियो ।

जनकपुरधामस्थित जनक हजारी विद्यापीठ क्याम्पसको हकभोगमा रहेको गुठी संस्थानको स्वामित्वमा रहेको करीब ३ बिघा जग्गाको नक्कली मालपोत कागजात बनाएको आरोपमा पक्राउ गरिएको एसपी थपलियाले बताए । महन्थ बैकुण्ठ समेत मिलेर जग्गाको लालपूर्जा नै नक्कली बनाएर स्थानीय अशोक शर्माको नाममा हक स्वामित्व गराइदिएको आरोपमा पक्राउ परेको उनले बताए ।

अशोक शर्मा १ साताअघि नै पक्राउ परी अनुसन्धानको क्रममा दिएको बयानको आधारमा महन्थ बैकुण्ठ समेतको संलग्नता देखिएपछि धनुषा जिल्ला अदालतको आदेशबाट महन्थको नाउमा पक्राउ पुर्जी जारी गरिएको थियो ।

गुठी संस्थान वा मालपोत कार्यालय कहीँबाट पनि त्यो जग्गाको स्वामित्व परिवर्तन भएको छैन । तर महन्थ बैकुण्ठ लगायतले गुठी संस्थानको नक्कली कीर्ते कागजात बनाएर नक्कली प्रमाणपत्र बनाएर अशोक शर्माको हकमा स्वामित्व परिवर्तन गरेको देखिको एसपी थपलियाले बताए । ‘विगतमा पनि उनले कुनै अपराध गरेका छन् कि भन्ने कुराको समेत अनुसन्धान हुनेछन् । त्यसपछि कानून बमोजिम उनलाई सजाय माग दाबी गर्दै अदालतमा उपस्थित गराइने छ,’ उनले भने, ‘मुद्दाको अहिले पनि म्याद बाँकी नै रहेकाले महन्थ बैकुण्ठसँग अब प्रहरीले बयान लिने काम गर्छ र अनुसन्धान पूरा गरेर अदालतसमक्ष उपस्थित गराउने छौं ।’

क्यापम्सका प्राचार्य विजयकुमार चौधरीले दिएको जाहेरीको आधारमा अनुसन्धान गरिएको उनले बताए । उनलाई पक्राउ गरेपछि एसपी थपलियाले भने, ‘धर्मको आधारमा, राजनीतिको आवरणमा वा अन्य कुनै शक्तिको आवरणमा कसैले अपराध गरेपनि उनले उन्मुक्ति पाउँदैनन् । कानूनको दायरामा यसैगरी ल्याइन्छ ।’

पुरानो मुद्दा भएकाले पुरानै मुलुकी ऐन अन्तर्गत सजाय माग दाबी गरिने एसपी थपलियाले बताए । महन्थ बैकुण्ठ पक्राउ परेसँगै जनकपुरधाम शहरमा अहिले यतिबेला उनकै सर्वत्र चर्चा भइरहेको छ । महन्थ बैकुण्ठ जनकपुरमा शक्तिशाली व्यक्तिको रूपमा चिनिने गर्छन् ।

पछिल्लो समय प्रतिनिधि सभाको निर्वाचन हुँदा राजपाका नेता राजेन्द्र महतो र नेकपाका नेता रघुवीर महासेठ पनि उनको मठमा पुगेर उनीसँग आशिर्वाद लिएका थिए । महासेठ हाल भौतिक पूर्वाधार मन्त्री छन् ।

मंसिर २०, २०७५ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस