मन पराएको केटासँग बिहे गर्ने विवाद बढेर आमाद्वारा छोरीको हत्या

मंसिर २०, २०७५

जनकपुरधाम – धनुषाको जनकपुरधाम उपमहानगरपालिकामा छोरी र आमाबीच विवाद हुँदा आमाले छोरीको हत्या गरेको छ ।

जिल्ला प्रहरी कार्यालय धनुषाका एसपी गोविन्द थपलियाका अनुसार जनकपुरधाम उपमहानगरपालिका–२४ स्थित सोनापरा टोलमा आमाले १६ वर्षीय छोरीको हत्या गरेको हो ।


ADVERTISEMENT

बुधवार रामवरण मण्डलकी १६ वर्षीय छोरी सोनी मण्डललाई उनकै आमा ४५ वर्षीय रामकुमारी मण्डलले घाँटी थिचेर हत्या गरेको आरोपमा आमा रामकुमारीलाई पक्राउ गरिएको एसपी थपलियाले बताए ।

पक्राउ परेकी आमाले हत्या गरेको कुरा स्वीकार समेत गरिसकेको उनले बताए । ‘आफूले इच्छाएको केटासँग बिहे गर्ने विषयमा छोरीको आमाबुवासँग विगत १ सातादेखि विवाद चल्दै आएको थियो । तर आमाबुवाले भने त्यो कुरा मान्न तयार थिएनन् । परिणाम स्वरूप आमाले छोरीलाई विगत ७ दिनदेखि घरमै थुनेर राखेका थिए,’ एसपी थपलियाले भने ।

केटाकेटीकै उमेरमा भागेर बिहे गर्ने क्रम बढेकाले आफ्नो छोरी पनि कहीँ भाग्लान् कि भनेर उनीहरूले छोरीलाई थुनेर राखेका जनाइएको छ । ‘आमाबुवा र छोरीको अलग–अलग खाना समेत बन्ने गर्थ्यो । बुधवार साँझतिर आमा र छोरीबीच खाना खाने बेला झगडा भयो । झगडाका क्रममा छोरीले आमालाई घरको गेट बन्द गर्ने ‘बिलैया’ काठले हिर्काउँदा आवेशमा आएर आमाले पनि छोरीको घाँटी थिची हत्या गरिन्,’ एसपी थपलियाले भने ।

घटनाको अनुसन्धानका क्रममा मृतकका आमाबुवा र छिमेकीलाई समेत पक्राउ गरेर सोधपुछ गरिएको भएपनि आमा मात्र दोषी देखिएकाले अरु सबैलाई छाडिएको उनले बताए ।

मंसिर २०, २०७५ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस