विराटनगरको रानी प्रहरी तालिम केन्द्र गोठगाउँ सार्ने तयारी, जग्गा प्राप्तिको प्रक्रिया शुरू

मंसिर २०, २०७५

विराटनगर – विराटनगरस्थित क्षेत्रीय प्रहरी तालिम केन्द्र सुरक्षित ठाउँको खोजीमा अन्यत्र लैजान तयारी शुरू भएको छ ।

विराटनगरको रानीमा रहेको पूर्वक्षेत्रीय प्रहरी तालिम केन्द्र साँगुरो भएको कारण अन्यत्र स्थानान्तरण गर्न लागिएको प्रदेश प्रहरी कार्यालय विराटनगरले जनाएको छ । 


ADVERTISEMENT

स्थानान्तरण गर्नको लागि पहिलो चरणमा जग्गा हेर्ने काम पूरा भएकाले जग्गा प्रहरीको स्वामित्वमा ल्याउने बारेमा काम शुरू भएको प्रदेश प्रहरी कार्यालय विराटनगरका डीआईजी केदार रिजालले बताए ।

पहिलो चरणमा जग्गा हेरेर नगरपालिकाबाट सिफारिस गराउने काम शुरू भएकाले चाँडै नै यो स्वामित्वमा आउने बित्तिकै भौतिक संरचना निर्माणको काम शुरू हुने रिजालले जानकारी दिए । ‘अहिले नै तत्काल सरिहाल्ने भन्ने कुरा हैन,’ डीआईजी रिजालले भने, ‘अब धेरैलाई तालिम पनि दिनुपर्ने हुँदा फायरिङमा समस्या हुने भएकाले अन्यत्र सार्ने प्रयास गरेका हौ ।’ अहिले बस्ती बढ्दै जाँदा तालिम केन्द्रमा तालिम गर्न समेत समस्या भएको प्रहरीको भनाई छ ।

बस्ती नजिकै हुँदा गोली उछिट्टिएर बाहिर जाने हो कि भन्ने चिन्ता रहेकाले सुरक्षित स्थानमा तालिम केन्द्र खोजी अभियान अन्तर्गत सुन्दर हरैचा नगरपालिकाको गोठगाउँमा जग्गा भेटिएको डीआईजी रिजालले बताए । 

प्रदेश प्रहरी कार्यालय रहेको स्थानमा अब भीडभाड बढ्ने, सरुवा बढुवादेखि सबै काम यहीँबाट गर्नुपर्ने भएकाले क्षेत्र साँगुरो हुने समेत देखिएपछि स्थानको खोजी भएको रिजालले बताए ।

हाल तालिम केन्द्र भएको ठाउँ रानीमा १ नम्बर प्रदेश प्रहरी कार्यालय, तालिम केन्द्र र प्रदेश सशस्त्र प्रहरी गण गरी नेपाल प्रहरीका सुरक्षा निकायका ३ कार्यालय एकै स्थानमा रहेका छन् ।  मुलुक संघीयतामा गएसँगै सुरक्षा निकायको काम कारवाही तथा तालिमका कुरामा बृद्धि हुने बताउँदै रिजालले तालिम केन्द्रका लागि पहिलो रोजाइमा मोरङकै सुन्दरहरैचा नगरपालिको गोठगाउँमा जग्गा फेला परिसकेको छ । 

जग्गा प्राप्तिसँगै अब हुने प्रहरी भर्नामा सोही स्थानबाट तालिम गराउने तयारीमा प्रदेश प्रहरी कार्यालय रहेको छ ।

मंसिर २०, २०७५ मा प्रकाशित

प्रतिक्रिया दिनुहोस