काठमाडौँ– प्रस्तावित विधान संशोधनका विषयमा केन्द्रित नेपाली काङ्ग्रेस केन्द्रीय कार्यसमितिको बैठक आज पनि जारी रहने भएको छ । काँग्रेस मुख्यसचिव कृष्ण प्रसाद पौडेलले बिहान ११ बजेपछि पार्टी कार्यालयमा बैठक बस्ने जानकारी दिए । काँग्रेस बैठक गत मंसिर ९ गतेदेखि जारी छ । 

यसअघि बिहिबारको बैठकमा आमन्त्रित सदस्यसहित ९ जना केन्द्रीय सदस्यले आआफ्नो धारणा राखेका थिए ।

बैठकमा केन्द्रीय सदस्य अर्जुननरसिंह केसी, दिलबहादुर घर्ती, डा मीनेन्द्र रिजाल, शङ्कर भण्डारी, जीवन परियार, वीरबहादुर बलायर, पार्टी प्रवक्ता विश्वप्रकाश शर्मा तथा केन्द्रीय आमन्त्रित सदस्य हसन अन्सारीले आआफ्नो धारणा राखेका हुन् । 

काङ्ग्रेसले पार्टीको विधानलाई सङ्घीय संरचनाअनुसार परिमार्जित गर्न विधान संशोधनको प्रस्ताव तयार गरेको छ । 

पार्टीको विधान संशोधन मस्यौदा समितिका संयोजक एवं महामन्त्री पूर्णबहादुर खड्काले प्रस्तावित विधानको मस्यौदा मङ्सिर ९ गतेको केन्द्रीय समितिको बैठकमा पेश गरेका थिए ।