मुम्बई–संयुक्त अरब इमिरेट्स (युएई) बाट पक्राउ परेका भारतीय गायक मिका सिंह भारतीय दूतबासको पहलपछि रिहा भएको समाचार छ । 

ब्राजिलियन एक १७ वर्षीया मोडलको उजुरीका आधारमा उनी पक्राउ परेका थिए । सिंहविरुद्ध ती मोडलले अश्लिल तस्बिर पठाएको भन्दै दुबई प्रहरीमा उजुरी दर्ता गराएकी थिइन् । 

युएईका लागि भारतीय राजदूत नवदीप सिंह पुरीले गल्फ न्यूजलाई बताएअनुसार भारतीय दूतावासको पहलमा उनी शुक्रबार रिहा भएका हुन् । यद्यपी युएई प्रहरीले उनीविरुद्ध अदालतमा मुद्दा चलाउन सक्नेछ ।

प्रहरीले उनलाई दुबैबाट नियन्त्रणमा लिएर आबुधाबी लगेको थियो । किनकी उजुरीकर्ताको  आबुधाबीको आवासिय भिसा रहेको छ ।  

समाचारअनुसार मिका एक अवार्ड कार्यक्रममा सहभागि हुन दुबई पुगेका थिए ।