काठमाडौं — बार्सिलोनाले इंग्लिश प्रेमियर लीगको टोली टोटनहम स्पर्सका स्ट्राइकर ह्यारी केनलाई भित्र्याउन खोजेको द डेली स्टार पत्रिकाले लेखेको छ । 

बार्साका स्ट्राइकर लुई सुआरेज कहिले राम्रो खेल्ने, कहिले नराम्रो खेल्ने अनि घाइते भइरहने भएकाले उनको स्थानमा केनलाई ल्याउनु उपयुक्त ठहर क्लबले गरेको हो । 

तर केनलाई किन्नका लागि बार्सिलोनाले लगभग २९ अर्ब रुपैयाँ खर्च गर्नुपर्ने हुन्छ । 

केन च्याम्पियन्स लीगको एक खेलमा बार्सिलोनाविरुद्ध खेल्न मंगलवार क्याम्प नाओ पुग्दैछन् । उनको खेललाई क्याटालानहरूले नजिकैबाट हेर्ने र उनीसँगको सम्झौता अघि बढाउन पहल गर्ने अपेक्षा छ । 

हुन त टोटनहम केनलाई कुनै पनि हालतमा बेच्न चाहँदैन तर उसको नयाँ स्टेडियम बन्नका लागि ढिलाइ हुँदा खर्च ह्वात्तै बढेकाले क्लबले केनलाई बेच्नुपर्ने पनि हुन सक्छ । केनले लीगको यस सीजनमा नौ गोल गरिसकेका छन् । 

केनलाई प्राथमिकतामा राखेपनि बार्साले किलियन एम्बाप्पे, नेयमार र एन्टोइन ग्रीजम्यानमा पनि चासो देखाएको छ । 

सुआरेज ३२ वर्षका भइसकेका छन् र उनको खेल उतारचढावपूर्ण हुने गरेको छ । त्यसैले उनलाई बेच्नुमै बार्साले भलो देखेको छ । तर २९ अर्ब एकजना खेलाडीका लागि खर्च गर्नु चाहिँ क्लबका लागि निकै गाह्रो हुने भएकाले
उनीहरूको ध्यान अन्तै मोडिन सक्छ ।

एभरटन क्लबका रिचार्लिसन पनि बार्सिलोनाको नजरमा परेको समाचार द डेली स्टारले छापेको छ ।

एजेन्सी