काठमाडौं — रुसका एक पूर्वप्रहरीलाई उक्त देशकै सबभन्दा खतरनाक अपराधी ठहर गरिएको छ । कुल २२ जना महिलाको हत्या गरेको स्वीकार गरेपछि जन्मकैदको सजाय पाएका उनले थप ५६ हत्या स्वीकारेपछि दोहोरो जन्मकैद सजाय दिइएको छ । 

पोपकोभ नाम गरेका ती अपराधीलाई रुसको साइबेरियामा रहेको इर्कुत्स्क नामक शहरको एक अदालतले दोस्रो जन्मकैदको सजाय दिएको हो । 

उनको मुद्दाको सुनुवाइ लामो समयदेखि चलिरहेको थियो । त्यसक्रममा ३२२ वटा अदालती फाइलहरू न्यायाधीशहरूकसमक्ष पेश गरिएको थियो । 

अंगार्स्क नामक स्थानमा प्रहरी अधिकारी रहेका पोपकोभलाई मान्छे मार्न मन लाग्ने मानसिक रोग लागेको अभियोजनकर्ताहरूले बताए । 

सन् २०१२ मा डीएनए मिलेपछि प्रहरीले उनलाई पक्राउ गरेको थियो । पक्राउका बेलामा पोपकोभले कुनै प्रतिकार गरेनन् र २२ वटा हत्या गरेको स्वीकारे । उनका शिकार १६ देखि ४० वर्ष उमेरका महिला थिए । एक पुरुष प्रहरीलाई पनि उनले मारे । 

अनुसन्धानकर्ताहरूका अनुसार, उनी प्रतिभाशाली अभिनेता थिए । ड्युटीमा हुँदा उनी कानूनको पालना गर्ने अधिकारी बन्थे भने रात परेपछि उनी क्रूर र दयारहित पशु बन्थे । 

बाईसवटा हत्याका लागि सजाय पाएपछि पोपकोभले थप ५९ जना मारेको स्वीकार गरे । सन् १९९२ देखि २००७ सम्म उनले ५६ जनालाई मारेका थिए । कानून कार्यान्वय अधिकारीहरूले सयौं साक्षीको अन्तर्वार्ता र अनेकौं फोरेन्सिक
परीक्षण गरेपछि हत्याहरूमा उनको संलग्नताका बारेमा पत्ता लगाए । 

उनी प्रहरीको बर्दी लगाउने अनि नाइटक्लब वा बारबाहिर कार रोकेर रक्सीले टिल्ल परेका एक्ला महिलालाई कुर्ने गर्थे । ती महिलालाई उनी आफ्नो कारमा फकाएर लाने अनि जंगलमा पुगेपछि उनीहरूलाई बलात्कार गरेर मार्ने गर्थे । 

उनले हत्याका लागि प्रायः बन्चरो र चक्कु प्रयोग गर्थे । तर उनी प्रहरीको प्रमाण राख्ने भाँडोबाट घरायसी हतियार लिएर पनि हत्या गर्थे ।

अचम्मको कुरा त, पोपकोभ कहिलेकाहीँ आफैंले गरेको हत्याको अनुसन्धान गर्न पनि प्रहरी टोलीसँग खटिन्थे । 

एजेन्सी