काठमाडौं–संवैधानिक परिषद्को बैठक मिति परिवर्तन भएको छ । आगामी पुस ५ गतेका लागि तय भएको परिषद् बैठकको मिति एकाएक परिवर्तन गरी बुधबार बिहान ९ बजेको लागि बोलाइएको हो । 

संघीय संसदको प्रतिनिधिसभाकी उपसभामुख डा शिवमाया तुम्बाहाम्फेले बुधबार बिहान ९ बजेका लागि बैठक बोलाइएको लोकान्तरलाई जानकारी दिइन् । 

यसअघि मंगलबार साँझ ५ बजेका लागि तय भएको बैठक पुस ५ गते बस्नेगरी स्थगित गरिएकोमा फेरि एकाएक मिति परिवर्तन गरेर बुधबारको लागि बोलाइएको हो । 

परिषद्को बैठकले नयाँ प्रधानन्यायाधीश सिफारिसको निर्णय गर्नेछ । न्याय परिषद्ले प्रधानन्यायाधीशका लागि  न्यायाधीश दीपकराज जोशी र चोलेन्द्र शमशेर राणाको नाम संवैधानिक परिषदमा पठाएको  छ । यसअघि पनि सिफारिस भएका जोशीलाई संसदीय सुनुवाई समितिले अनुमोदन नगरेको र राणापनि विवादित पृष्ठभूमिका भनिएकाले परिषद्बाट नाम सिफारिस हुन सकस परेको बताइन्छ । 

तर, प्रधानन्यायाधीश ओमप्रकाश मिश्रले उमेर हदका कारण आगामी पुस १७ गतेबाट अनिवार्य अवकास पाउने भएकाले सो अगावै प्रधानन्यायाधीश नियुक्ति गर्नुपर्ने बाध्यता छ । 

संवैधानिक परिषदबाट सिफारिस भएको व्यक्ति संसदीय सुनुवाई समितिबाट अनुमोदन भएपछि राष्ट्रपतिबाट नियुक्ति गर्ने संवैधानिक व्यवस्था छ ।