सुर्खेत– लागूऔषध दुर्व्यसनमा फसेका कारण त्यसबाट मुक्त हुन चार पटक सुधारगृह (रिह्याव सेन्टर)मा बसेका युवा तरकारी खेतीमा जम्न थालेका छन् । वीरेन्द्रनगरको वडा नं. ४ भैरवस्थानमा बसन्त कोइरालाले तरकारी खेती गरिरहेका हुन् ।

करिब १० वर्ष लागूऔषधको प्रयोगकर्ताका रुपमा रहेका कोइराला अहिले तरकारी खेतीमा व्यस्त छन् । उनले आठवटा टनेल बनाएर टमाटर, ब्रो काउली, काउली, गोभी, काँक्रा, लौका, हरियो सागलगायतका तरकारी उत्पादन गरिरहेका छन् ।

शहरी विकास तथा भवन डिभिजनमा जागीर शुरु गरेका कोइरालाले संकटकालमा जागिर छाडेका थिए । उनले अहिले ८ कट्टा जमीनमा तरकारी खेती गरिरहेका छन् । एक सिजनमा उनले आठवटा प्लाष्टिक घरबाट ८ लाख रुपैयाँ कमाउने लक्ष्य समेत लिएका छन् ।

बेमौसमी तरकारी उत्पादन गर्ने उनको लक्ष्य छ । ‘चिसोमा विभिन्न जातका तरकारीहरु उत्पादन हुँदैनन् ।’ उनले भने, ‘साउन, भदौ, असोजको तापक्रम टनेलमा दिएर उत्पादन गर्ने गरेका छौं ।’ अहिलेसम्म १० लाख रुपैयाँ लगानी गरिसकेका कोइरालाले जेटीएसमेत राखेका छन् । जेटीएले तरकारीमा लागेको किरा, रोग आइलागेको खण्डमा त्यसको उपचार गर्ने गर्छन् । उनले एकजना काम गर्ने कर्मचारी पनि राखेका छन् । बाँकी आफैं बारीमा खटने गरेका छन् ।

उनले लागूऔषध प्रयोग गरेका र अहिले छोडेका व्यक्तिहरुले पनि काम गर्न सक्छन् भन्ने देखाउन तरकारी खेती गरेको बताए । ‘लागूऔषध प्रयोग गरेर अहिले सामान्य जीवन जीइरहेका युवाले चाहेको खण्डमा जस्तो सुकै काम गर्न सक्छन् भन्ने देखाउन पनि म यो कार्यमा जुटेको हुँ ।’ उनले भने, ‘यसबाट समाजमा राम्रो सन्देश जाने मेरो अपेक्षा हो ।’

उनले तरकारी खेती गर्दा हाइ भ्यालुले केहि सहयोग गरेको बताए । अन्यत्रबाट केहि सहयोग नपाइएको बताउँदै आफूले थप ७ कट्टा जमीन भाडामा लिएको र त्यसमा पनि तरकारी खेती नै गर्ने जानकारी दिए । वीरेन्द्रनगर नगरपालिका वडा नम्बर ४ का वडाअध्यक्ष निलकण्ठ खनालले नगरपालिकाले तरकारी खेती गर्ने युवाहरुलाई प्रोत्साहन दिइरहेको बताए । 

उनले काम नगर्ने, खेती गर्नेलाई हेला गर्ने प्रचलनका कारण देशमा खाद्यान्न, तरकारीलगायतका वस्तु विदेशबाट ल्याउनु परेको बताउँदै नगरपालिकाले युवाहरुलाई खेतीमा लगाउन प्रोत्साहन गरिरहेको जानकारी दिए ।