काठमाडौं — भारतको उत्तर प्रदेशको राजधानी लखनउमा बस्न् एक युवकले प्रहरी परामर्श केन्द्रमा पठाएको एक पत्र अहिले खुबै चर्चामा छ । 

पत्रमा उनले लेखे, ‘साहब, पत्नीले कोठा थुनेर बेल्ना र लट्ठीले ठटाउने गरेकी छ । विरोध गर्दा बूढी आमा र बहिनीहरूलाई पनि पिट्न खोज्छे ।’

यस्तो पत्र लेख्ने ती एक मात्र पुरुष हैनन् । अन्य पुरुषहरूले पनि पत्नीबाट पीडित भएको भन्दै प्रहरी परामर्श केन्द्रमा पत्र पठाएका छन् । 

फेजुल्लाहगंजमा बस्ने एक व्यक्तिले उजुरीमा लेखे, ‘एक्काईस वर्षअघि मेरो बिहे पुरनियासँग भएको थियो । मेरी पत्नी असाध्यै शंकालु छे र विगत पाँच महिनादेखि दिनदिनै झगडा पर्छ । एक रात पत्नीले लट्ठीले बेस्सरी हिर्काउँदा मेरो
हातै भाँचियो । पत्नीले मेरा बूढा बुवालाई पनि केही खान दिन्न । प्रहरी परामर्श केन्द्रमा परामर्श लिँदाखेरी पनि ऊ मारपिट गर्न खोज्छे ।’ 

बल्दीखेडा निवासी एक युवकले परामर्श केन्द्रमा उजुरी गर्दै भने, ‘यसै वर्षको जुन महिनामा मेरो बिहे मोहद्दीपुर निवासी युवतीसँग भयो । बिहेको केही दिनपछि पत्नी माइतमा बस्न थालिन् । किन त्यहाँ बस्न थालेको भनी सोध्दा पत्नीले
तिमी नराम्रो छौ, राम्रो भएपछि मात्र म फर्किन्छु भनिन् ।’ 

पतिले निवेदन दिएपछि दुवैलाई परामर्श दिइएको छ । 

परामर्श केन्द्रकी इन्चार्ज बबिता सिंहले पत्नीलाई सम्झाइबुझाइ गर्न गाह्रो भएको बताइन् । महिलाले पतिको कुरै सुन्न नचाहने अनि डिभोर्सको धम्की दिने गरेको भेटिन्छ । 

एजेन्सी