सुर्खेत–कर्णाली प्रदेश सरकारको उद्योग, पर्यटन, वन तथा वातावरण मन्त्रालयले चालु आर्थिक वर्षको विकासे बजेटअन्तर्गत विनियोजन गरेको बजेट कार्यान्वयन गर्न योजना स्थलमै गइरहेको छ । कर्णालीका दश जिल्लामा तटबन्ध परेका स्थानहरूमा भू तथा जलाधार व्यवस्थापन कार्यालयका प्रमुख शेखर चपाईको नेतृत्वमा स्थलगत अध्ययनका लागि टोली खटेको हो ।

टोलीले सुर्खेत, दैलेखका केही स्थानहरूको अवलोकन गरिसकेको छ भने आज उनको नेतृत्वको टोली सल्यानतर्फ प्रस्थान गरेको छ । यसरी योजना परेको ठाँउमा योजना छ की छैन, कतै कसैले दुरुपयोग गर्न खोजेका हुन कि भन्ने बारेमा अध्ययन गर्न टोली खटाइएको मन्त्री नन्दसिंह बुढाले लोकान्तरलाई बताए ।

केही मिडियामा खोला नै नभएको स्थानमा बजेट गएको भन्ने समाचार आएको थियो । मन्त्री बुढाले भने, ‘आफ्नो मन्त्रालयबाट विनियोजित रकमको दुरुपयोग नहोस र जनताले विकासको अनुभूति गर्न पाउन भन्ने उद्देश्यका साथ हामीले कर्मचारीलाई योजना परेको स्थानमा नै जान र आवश्यकता हो कि होइन बुझ्न निर्देशन दिएका छौं । सोही योजना मुताविक उहाँहरु गाउँगाउामा जान लाग्नु भएको हो ।’

मन्त्री बुढाले यसरी उपभोक्ता समिति बनाउनु पूर्व नै योजना स्थलमा कर्मचारी खटाएर सरकारले आवश्यकता पहिचान गर्न र बजेट कार्यान्वयनमा सहयोग पुग्ने अपेक्षासहित मन्त्रालयअघि बढेको जानकारी दिए । उनका अनुसार अबको दुई हप्ताभित्रै बजेट कार्यान्वयनमा जाने भएको छ । मन्त्रालयले अहिले विभिन्न कार्यविधिहरू बनाइरहेको र कार्यविधि बनाउने अन्तिम चरणमा रहेको मन्त्री बुढाको भनाइछ ।