काठमाडौं — यमन युद्ध र पत्रकार जमाल खशोग्गीको हत्यामा देखाएको आचरणका लागि साउदी अरबलाई निन्दा गर्ने एक प्रस्तावमा अमेरिकी सिनेटले बिहीवार मतदान गर्ने भएको छ । 

रिपब्लिकन र डेमोक्रेट दुवै दलका सांसदहरूको एक समूहले अर्को वर्ष साउदीमाथि प्रतिबन्ध लगाउने कानून ल्याउने प्रतिज्ञा गरेका छन् । 

दक्षिण क्यारोलाइनाका रिपब्लिकन सांसद सिनेटर लिन्डसे ग्राहम र न्युजर्सीका डेमोक्रेट सिनेटर बब मेनेन्डेजले आफूहरूको समूह साउदीविरुद्ध आर्थिक जरिवाना तथा हतियार बिक्रीमा प्रतिबन्ध सम्बन्धी कानून ल्याउनका लागि योजना बनाइरहेको बताए । 

अहिलेसम्मकै सबभन्दा कडा टिप्पणी गर्दै सिनेटरहरूले युवराज मोहम्मद बिन सलमानलाई सत्ताबाट हटाइएको आफूहरूले हेर्न चाहेको बताए । 

कंग्रेसका सदस्यहरूले अमेरिकी जासूसी संस्थाले अक्टोबर २ मा इस्तानबुलमा भएको खशोग्गीको हत्यामा साउदी अरबको हात रहेको देखाएको बताएका छन् । 

बुधवार सिनेटले ६०–३९ मतान्तरले युद्ध अधिकार प्रस्तावमाथि बहसलाई अघि बढाउने निर्णय लिए । उक्त प्रस्तावले यमनमा चलिरहेको युद्धमा साउदी नेतृत्वको अभियानबाट अमेरिकी सैन्य सहायता फिर्ता लिनका लागि ट्रम्प
प्रशासनलाई दबाब दिनेछ । यमन युद्धमा हजारौं मानिस मारिइसकेका छन् र संयुक्त राष्ट्रसंघले यसलाई संसारकै सबभन्दा खराब मानवीय संकटका रूपमा वर्णन गरेको छ । 

यस विषयमा अन्तिम मत बिहीवार दिइने अपेक्षा गरिएको छ । यो प्रतीकात्मक कार्य हो र यसले साउदी अरब तथा ट्रम्प प्रशासन दुवैलाई कडा आलोचना गरेको सिनेटरहरू बताउँछन् । 

अलजजीराबाट