काठमाडौं –काभ्रे तेमाल गाउँपालिका– ६ का ७० वर्षीय गंगाबहादुर रानामगर ट्रमा सेन्टरको ४ सय ४७ नम्बर शय्यामा छट्पटाउँदै छन् । बाटोमा हिँड्दै गर्दा लडेर घाइते भएका मगरलाई उनका छोराहरूले मंसिर १५ गते ट्रमा सेन्टरमा उपचारका लागि ल्याएका थिए ।

मगरको कम्मरको हड्डी भाँचिएकाले अप्रेसन गरेर उपचार गर्नुपर्ने ट्रमा सेन्टरका निमित्त निर्देशक एवं अर्थोपेडिक डाक्टर विनोद शेरचनले बताए ।

तर अप्रेसनका लागि स्वास्थ्य परीक्षण गर्दा मगरको छातीमा पनि समस्या देखियो । उनको छातीमा देखिएको समस्या पहिचान गरी र अप्रेसन गर्न उपयुक्त छ, छैन परीक्षण गरेपछि मात्रै उपचार अघि बढ्ने चिकित्सकले बताएका छन् । 

ट्रमा सेन्टरमा छातीको समस्या पत्ता लगाउने विशेषज्ञ चिकित्सकको दरबन्दी छैन । त्यसैले ट्रमा सेन्टरले वीर अस्पतालको कार्डियोलोजिस्टलाई मगरको स्वास्थ्य परीक्षण गरिदिन पत्रमार्फत् नै आग्रह गरेको थियो । तर वीरका कार्डियोलोजिस्ट मगरको स्वास्थ्य जाँच गर्न ट्रमा सेन्टर गएनन् ।

‘बुवाको कम्मरको हड्डी भाँचिएको छ, डाक्टरले अप्रेसन गर्नुपर्ने भन्नुभएको थियो तर छातीमा दाग देखिएको छ,’ मगरका छोरा धनबहादुर मगरले भने, ‘यहाँको डाक्टरले विर अस्पतालको डाक्टरलाई बोलाउनु भनेर सिफारिस पठाउनुभएको थियो, तर ४ दिन भयो बोलाउन गएको अझै आउनुभएको छैन ।’

अस्पतालमा भर्ना भएको १२ दिन पुग्दा पनि बुवाको उपचार शुरू नहुँदा धनबहादुर निराश बनेका छन् ।

‘वीर अस्पतालको डाक्टरले हेरेर सल्लाह नगरी अप्रेसन गर्न मिल्दैन रे ! १२ दिन भइसक्यो अस्पताल ल्याएको उपचार नै शुरू भएन, डाक्टर समयमै नआइदिँदा उपचार नै अड्किएको छ,’ निरास हुँदै उनले भने ।
वीरका चिकित्सकहरू ट्रमा सेन्टरमा नगइदिँदा काभ्रेका मगरजस्तै अन्य बिरामीले पनि समयमै उपचार सेवा नपाएका थुप्रै घटना छन् । 

ट्रमा सेन्टरका निमित्त निर्देशक डा. शेरचनले वीर अस्पतालका चिकित्सक नआइदिँदा मगरको शल्यक्रिया शुरू गर्न नसकिएको बताए ।

‘उहाँको हिपको जोर्नीको गेडी भाँचिएको छ । अप्रेसन गरेर उपचार गर्नुपर्ने तर छातीमा समस्या देखियो,’ डा. शेरचनले लोकान्तरसँग भने,  ‘सम्बन्धित रोगका डाक्टरले नहेरी उपचार गर्न सम्भव छैन, तर एकसाता भयो वीरबाट डाक्टर नआइदिँदा उपचार गर्न सकेका छैनौं ।’

यस्तो छ व्यवस्था

ट्रमा सेन्टर र वीर अस्पताल राष्ट्रिय विज्ञान प्रतिष्ठान (न्याम्स) मातहतमा सञ्चालित अस्पताल हुन् । ट्रमा र वीर अस्पतालका चिकित्सकहरूले आवश्यक परेको समयमा दुवै अस्पतालमा सेवा दिनुपर्ने निर्णय न्याम्सले गरेको थियो ।

ट्रमा सेन्टर न्याम्स मातहतमा सञ्चालनमा आएदेखि नै न्याम्सका तत्कालीन उपकुलपति गणेशबहादुर गुरुङले आवश्यता अनुसार वीरका चिकित्सकले ट्रमाका बिरामी र ट्रमाका चिकित्सकले वीरका बिरामी हेर्न निर्देशन दिएका थिए । 

न्याम्सका पूर्व उपकुलपति गुरुङको निर्देशन अनुसार दुवै अस्पतालका चिकित्सकले दुवै अस्पतालमा आवश्यकता अनुसार सेवा दिने गरेका थिए । तर वीर अस्पतालका केही विभागका चिकित्सक ट्रमा सेन्टरमा समयमै नगइदिने गरेको ट्रमा सेन्टरका चिकित्सकको गुनासो छ । वीर अस्पतालका चिकित्स बिरामीको स्वास्थ्य परीक्षणका लागि नगइदिँदा ट्रमा सेन्टरमा शल्यक्रिया मार्फत् हुने उपचारमा ढिलाइ हुने गरेको छ ।

दुई अस्पतालबीच पटक–पटक छलफल, समस्या उस्तै

दुवै अस्पताललाई आवश्यक पर्दा चिकित्सकहरू समयमै नगइदिने समस्या भने पुरानै हो । यही समस्या समाधानका लागि दुई अस्पतालका प्रशासकबीच पटक–पटक छलफल समेत भएको ट्रमा सेन्टरका निमित्त निर्देशक डा. विनोद शेरचनले बताए ।

‘सबै विभागका चिकित्सक त त्यस्तो हुनुहन्न, तर केही विभागका चिकित्सक भने आइदिनुहुन्न, यो समस्या पहिलादेखिकै हो,’ डा. शेरचनले भने, ‘यो समस्या समाधान गर्न अस्पताल प्रशासक प्रमुखहरूको पनि छलफल भएको छ । अब विभाग प्रमूखहरूसँग पनि छलफल गरिँदै छ ।’