काठमाडौँ- नेपाली काँग्रेसले मंसिर २८ गतेबाट शुरू हुने महासमितिको बैठकको तयारी अन्तिम चरणमा पुगेको जनाएको छ । काठमाडौँस्थित महासमिति बैठकस्थलमा बिहीवार आयोजित पत्रकार सम्मेलनमा पार्टी प्रवक्ता विश्वप्रकाश शर्माले महासमिति बैठकको तयारी अन्तिम चरणमा पुगेको जनाएका हुन् ।

शर्माले महासमितिमा करीब १६ सय जनाले सहभागिता जनाउने जानकारी दिए । जसमध्ये २४० निर्वाचन क्षेत्रबाट ५ जनाको दरले १२ सय जना, भातृसंस्था र सुभेच्छुक संस्थाबाट ९७ जना, विदेशस्थित जनसम्पर्क समितिहरूबाट ९७ जना रहेका छन् । ७७ जना जिल्ला सभापति मध्ये महासमिति सदस्य नरहेका ३४ जना र प्रतिनिधि र राष्ट्रिय सभामा सांसद रहेका तर महासमिति सदस्य नरहेका २६ जना पर्यवेक्षकका रूपमा महासमिति बैठकमा सहभागी हुने शर्माले बताए ।

बैठक शुरू हुने दिन २८ गते पार्टीको केन्द्रीय कार्यालय सानेपामा उपस्थित हुने सबै महासमिति सदस्यहरूको रजिस्ट्रेसन र स्वागत गर्ने कार्यक्रम रहेको प्रवक्ता शर्माले जानकारी दिए । स्वागतकै क्रममा सदस्यहरूलाई केन्द्रीय समितिबाट पारित भएका दस्तावेज हस्तान्तरण गर्ने कार्यक्रम रहेको छ ।