सुर्खेत – राष्ट्रिय प्रजातन्त्र पार्टीका अध्यक्ष कमल थापाले केही दिनअघि नेपालमा सम्पन्न भएको एसिया प्यासिफिक सम्मेलनमा सरकारले जनाएको तामझामपूर्ण सहभागिता आपत्तिजनक रहेको बताएका छन् ।

सरकारले आफ्नो सहभागितासँगै सरकारी सवारी साधनको समेत सम्मेलनका लागि उपयोग गरेको भन्दै उनले आपत्ति जनाएका छन् ।

शुक्रवार वीरेन्द्रनगरमा आयोजना गरिएको पत्रकार सम्मेलनलाई सम्बोधन गर्दै अध्यक्ष थापाले धर्म प्रचारक संस्थाको कार्यक्रममा सरकारको उत्साहपूर्ण सहभागिताले अल्पसंख्यकलाई रिझाउने नाममा बहुसंख्यकको विचार र आस्थामाथि सरकारले आघाता पुर्याएको अध्यक्ष थापाले टिप्पणी गरे । आगामी दिनमा यस्ता विषयमा सरकार सजग हुनुपर्ने उनले बताए ।

उनले वर्तमान सरकारको कार्यकाल जनअपेक्षा अनुसार नभएको टिप्पणी गरेका छन् । ‘जतिबेला चुनाव थियो, त्यतिबेला वर्तमान सरकारमा रहेको पार्टीले राष्ट्रियताका राम्रै मुद्दा उठाएका थिए, त्यसकारण पनि जनताले कम्युनिष्टलाई बहुमत प्रदान गरेका थिए,’ विगत स्मरण गर्दै अध्यक्ष थापाले भने, ‘जनताले जुन एजेण्डाका आधारमा अपेक्षा गरेका थिए, त्यस अनुसार सरकारको यो एक वर्षसम्मको काम देखिएन ।’ जनताले अपेक्षा अनुसारको सरकारबाट अनुभूति गर्न नपाएकोले सरकार असफल हुँदै गएको उनले बताए ।

राप्रपा अध्यक्ष थापाले देशमा हिन्दूराष्ट्र पुनःस्थापनाको मागसहित पार्टीले देशभर जनसंघर्ष गर्न लागेको बताएका छन् । पार्टीले गर्न लागेको जनसंघर्ष कुनै धर्म, पार्टीको विरोध नभई हिन्दूराष्ट्र पुनःस्थापनासँगै देशमा रहेको विकृति अन्त्यका लागि एकखालको जनदबाब भएको उनले बताए ।

जनसंघर्षका लागि अहिले देशका सबै प्रदेशमा पुगेर कार्यकर्तालाई प्रशिक्षण दिने अध्यक्ष थापाले जानकारी दिए । उनका अनुसार पुस र माघमा देशका सबै स्थानीय तहमा पार्टीको संगठन निर्माण गर्ने र फागुन ७ गतेबाट देशव्यापी रुपमा हिन्दूराष्ट्र पुनःस्थापनाको मागसहित जनसंघर्ष शुरू गरिने छ ।