काठमाडौं-  नेपाली कांग्रेसका नेता एवं पूर्व सभामुख तारानाथ रानाभाटले गुटवन्दी गरेर कांग्रेसले जग हँसाएको बताएका छन् । 

राजधानीमा आजबाट शुरु भएको नेपाली कांग्रेसको महासमिति बैठकको उद्घाटनसत्रमा बोल्दै नेता रानाभाटले चुनाव हार्नु स्वाभाविक भएको भन्दै चुनाव हार्दैमा नेपाली कांग्रेसको मनोबल यति धेरै गिर्न नहुने बताए । 

‘नेपाली काँग्रेसले स्थानीय, प्रादेशिक र केन्द्रीय चुनाव हार्यो तर यतिधेरै समय देशको नेतृत्व गरेको पार्टीको मनोबल चुनावसँगै हार्नु हुने थिएन । त्यसका लागि कांग्रेसभित्रका गुटहरू एक एक गरेर समाप्त गर्नुपर्छ ।’

कांग्रेसभित्र रहेका गुटैगुट रहेको भन्दै नेता रानाभाटले गुटको संख्या औंला भाँचेर गनेका थिए । ‘कांग्रेसभित्रका गुटहरू एक होइन, दुई होइन, तीन होइन, चार पनि होइन, पाँच वटाहरू रहेको समाचार दैनिक संचारमाध्यममा आउँछ ’ गुटको संख्या गन्दै रानाभाटले भने, ‘हिजो बेलुकासम्म झगडा गर्नुभयो पत्रपत्रिकामा समाचार आएका छन्, यो चालाले नेपाली कांग्रेस कहिले सुध्रिने ?’