काठमाडौं–नेपाली कांग्रेसका नेता प्रकाशशरण महतले पार्टी सभापति शेरबहादुर देउवा बोल्न नजान्ने भएपनि क्षमतावान नेता भएको टिप्पणी गरेका छन् । 

शनिबार(आज) बाट राजधानीमा शुरु भएको कांग्रेस महासमिति बैठकको उद्घाटन सत्रमा बोल्दै नेता महतले कतिबेला कस्तो निर्णय लिनुपर्छ भन्ने पार्टी सभापतिलाई राम्रोसँग थाहा भएको बताएका हुन् । 

‘कतिबेला कस्तो निर्णय लिनुपर्छ भन्ने सभापतिलाई थाहा छ, देउवा प्रधानमन्त्री नभएको भए तीनै तहको निर्वाचन हुन सम्भव थिएन’ महतले भने ।   

‘मलाई सभापतिको बोल्ने शैली चित्त बुझ्दैन तर वहाँ समयसँग अघि बढ्न सक्ने नेता हो’ कार्यक्रममा महतले भने,‘बोली त शुशील कोइरालाको पनि प्रष्ट थिएन, तर वहाँले आफ्नो नेतृत्वमा संविधान निर्माण गर्नुभयो ।’ उनले  कांग्रेस नेता एक आपसमा टुटफुट भएर अघि बढेका कारण यस्तो अवस्थामा पुगेको बताए । आगामी दिनमा १२ प्रतिशत मत बढाउने गरि लाग्नुपर्ने उनको भनाइ छ । 

महासमिति बैठक संयोगले सिंहदरबारको मूल गेट भन्दा ठीक अगाडि आयोजना गरिएको भन्दै महतले भने, ‘यो संकेत भनेको हामी अर्को पटक सिंहदरबार छिर्छौँ भन्ने हो ।’

नेपाली कांग्रेसको प्रचार शैली राम्रो नभएको भन्दै महतले जनताले थाहा पाउनेगरि प्रचार गर्नुपर्ने बताए ।  ‘एक दुई पटक हामी राम्रा छौं भन्दैमा जनताले विश्वास गर्दैनन् । त्यो भनेको भन्यै गर्नुपर्छ । अब हामी जनतासमक्ष हामी राम्रो छौं भनेर भनेको भन्यै गर्छौं र सिंहदरबारको यात्रा तय गर्छौं ।’