काठमाडौं– सेयर बजार सुधारको माग गर्दै लगानीकर्ताहरुले पुनः आमरण अनसन शुरु गरेका छन् ।

यसअघि एक हप्ता लामो रिले अनसनमा बसेका लगाीकर्ताहरुले सोमबार देखि पुनः आमरण अनसन शुरु गरेका हुन् । लगानीकर्ताहरु नेपाल स्टक एक्सचेन्जको कार्यालय अगाडी आमरण अनसनमा छन् ।

आफुहरुको माग सम्बोधनमा सरकारले ध्यान नदिएको भन्दै आमरण अनसनमा बसेका संयोजक हरि ढकालले जानकारी दिए । सरकारले आफ्नो माग सम्बोधन नगरेको र अध्ययन गर्न समिति गठन गरेको बाहाना बनाएको समेत ढकालले बताए ।

त्यसक्रममा उनले अर्थमन्त्री डा. युवराज खतिवडाको राजीनामा समेत माग गरे । सेयर लगानीमा आएको गिरावट लगायतका बारेमा अध्ययन गर्न अर्थ मन्त्रालयले एक समिति अध्ययन गरिसकेको अर्थमन्त्री खतिवडाले यसअघि नै जानकारी गराइसकेका थिए ।

सेयर बजारमा निरन्तर गिरावट आएपछि प्रतिनिधि सभाको अर्थ समितिले समेत अर्थमन्त्री र राष्ट्र बैंकका गर्भनर लगायतको धारणा माग गरेको थियो ।

यसैबीच सोमबार सेयर बजारमा सामान्य वृद्धि भएको छ । सोमबार नेप्सेमा १५ दशमलव १७ प्रतिशतले वृद्धि भएको नेपाल स्टक एक्सचेन्जले जनाएको छ ।

सोमबार व्यापार समुहबाहेक सबै समुहको सेयरमा सुधार देखिएको छ । व्यापार क्षेत्रमा ३ दशमलव ४ प्रतिशतले गिरावट आएको छ ।