काठमाडौं– शनिबारदेखि राजधानीमा नेपाली काँग्रेसको महासमिति बैठक जारी छ । महासमिति सदस्यका साथै समर्थक सुभेच्छुकहरुको चहलपहलले रामशाहपथ क्षेत्रमा दुई दिनयता भीडभाड देखिन्छ । 

कार्यकर्ताहरु नेतृत्वलाई आफ्नो माग राख्न नेतृत्वले देख्नेगरी पोस्टर टाँस्नेदेखि महासमितिले के निश्कर्ष निकाल्ला भन्ने अनुमान लगाउने जिज्ञासु र सुभेच्छुकहरु प्रशस्तै हुन्छन् बैठकस्थल परिसरमा । 

नेता कार्यकर्ताको  भीडभाड हुने ठाउँमा अनेकन स्वास्थ्य समस्या देखिनु स्वाभाविक हाे। यही क्रममा काँग्रेस केन्द्रीय सदस्य डा शेखर कोइराला सोमबार कार्यकर्ताको स्वास्थ्य जाँच गरिरहेको अवस्थामा भेटिए ।

 उनले कार्यकर्ताको सामान्य प्रेसरलगायतको जाँच गर्दै आवश्यक औषधिसमेतको सिफारिस गरेको बुझिएको छ ।   

पेसाले फिजिसियन कोइराला पछि मात्रै काँग्रेसको पूर्णकालीन राजनीतिमा लागेका थिए । 

राजनीतिमा पूर्णकालीन हुनुअघि चिकित्सकका रुपमा उनले विपी कोइराला स्वास्थ्य विज्ञान प्रतिष्ठान, धरान  र वीर अस्पतालमा काम गरेका थिए । 

यस्तै उनी बीपी कोइराला स्वास्थ्य विज्ञान प्रतिष्ठानको शिक्षाध्यक्ष र उपकुलपति भए ।