सुर्खेत–लामो रस्सा कस्सीका बीच कर्णाली प्रदेशमा नेपाल कम्युनिस्ट पार्टीको संसदीय दलको नेता सोमबार राती चयन गरिएको छ । नेपाल कम्युनिस्ट पार्टी कर्णाली प्रदेशका सह–इन्चार्ज यामलाल कंडेलको प्रस्तावमा मुख्यमन्त्री महेन्द्रबहादुर शाहीलाई संसदीय दलको नेतामा सर्वसम्मत चयन गरिएको हो ।

छलफलका क्रममा प्रदेशसभा सदस्यसमेत रहेका कंडेलले संसदीय दलको नेता विधि र विधान बमोजिम चयन गर्नुपर्नेमा सोझै माथिको आदेश अनुसार गरिनु राम्रो नभएको बताएका थिए । उनले दलको नेता चयन गर्न असहजताको वातावरणबाट भन्दा सहजताको बातावरण निर्माण गरी अघि बढनुपर्ने बताए ।

यसैबीच, पुस एक गते बसेको संसदीय दलको बैठकले बनाएको विधान कार्यदलले तयार पारेको विधान संशोधनसहित सोमबार बसेको बैठकबाट पारित भएको छ । उक्त कार्यदलको संयोजकमा संसद गुलावजंग शाह थिए भने सदस्यमा सामाजिक विकास मन्त्री दल रावल र सांसद सीता नेपाली रहेका थिए ।

संसदीय दलले अब गति लिन्छ
मुख्यमन्त्री शाहीले लोकान्तरसंगको कुराकानीमा अब संसदीय दलले गति लिने बताएका छन् । उनले संसदीय दलको प्रमुख सचेतक, सचेतक, विभिन्न संसदीय समितिको संयोजकहरु तत्कालै चयन गरिने जानकारी दिए । उनले दलको विधानअनुरुप चल्ने र सबैलाई समेटेर लैजाने प्रतिबद्धता जनाए ।