काठमाडौं– एभरेष्ट प्रिमियर लिग क्रिकेटको फाइनल प्रवेशको लागि मंगलबार ललितपुर प्याट्रिएटस र काठमाडौं किंग्स इलाभेनबीच प्रतिस्पर्धा हुँदैछ । टियु क्रिकेट मैदान कीर्तिपुरमा ललितपुर र काठमाडौंबीच पहिलो क्वालिफायर हुन लागेको हो ।

खेल दिउँसो १२:४५ बजे शुरु हुनेछ । ज्ञानेन्द्र मल्लको कप्तानीमा रहेको ललितपुर शीर्ष स्थानमा रहदै क्वालिफायरमा पुगेको हो । ललितपुरले पाँच खेलमा ८ अंक जोडेको छ । 

रोहन मुस्तफाको कप्तानीमा मैदान उत्रने काठमाडौंले पाँच खेलमा ८ अंक जोडेर दोस्रो स्थानमा रहँदै क्वालिफायरको यात्रा तय गरेको हो । काठमाडौं लिग चरणमा ललितपुरसंगै पराजित भएको थियो । काठमाडौं लिग चरणको हारको बदला लिने तयारीमा छ ।

ईपीएलको नियम अनुसार शीर्ष दुई टोलीले क्वालिफायरमा स्थान बनाउने छन् । जस अन्तर्गत ललितपुर र काठमाडौंबीचको विजेता सिधै फाइनलमा पुग्नेछ । पराजित हुने टोलीले दोस्रो क्वालिफायर खेल्ने मौका पाउने छ ।

आज पराजित हुने टोलीले फाइनल प्रवेशको लागि इलिमिनेटरको विजेतासंग खेल्नेछ । इलमिनेटरमा भैरहवा ग्लाडिएटर्स र चितवन टाइगर्सबीच प्रतिस्पर्धा हुने छ । अर्को खेल बुधबार हुने बताइएको छ ।