काठमाडौं- श्रम, रोजगार तथा सामाजिक सुरक्षा मन्त्री गोकर्ण विष्टले नेपालमा पसिना बगाउने युवा अपमानित हुने परिस्थिति अन्त्य भएको बताएका छन् ।

अन्तर्राष्ट्रिय आप्रवासन दिवसको अवसरमा राजधानीमा आयोजित एक कार्यक्रममा बोल्दै मन्त्री विष्टले वैदेशिक रोजगारीका क्षेत्रमा देखिएका विकृति, विसंगति, अपारदर्शीतालाई कायम राखेर लाखौँ युवाको जिन्दगी धरापमा पार्न नसकिने भन्दै विगतमा यस क्षेत्रमा देखिएको अवस्थाले प्रश्रय पाउने सम्भावना बिस्तारै समाप्त भएको बताएका हुन् ।

संसारका कुनै पनि देशको विकासका लागि मानवसंशाधन र श्रम एउटा महत्त्वपूर्ण पक्ष रहेको भन्दै आम जनताको हीतका लागि गरिएका सुधारका प्रयत्नहरूलाई रोक्ने खालको प्रवृत्तिलाई निस्तेज पारिने विष्टको भनाइ छ ।

संयुक्त राष्ट्रसंघले हरेक वर्षको डिसेम्बर १८ तारिखलाई अन्तर्राष्ट्रिय आप्रवासन दिवसको रूपमा मनाउँदै आइरहेको छ ।