काठमाडौं – विधान संशोधन प्रतिवेदन नआई महासमिति बैठकको बन्दसत्र शुरू गर्न नमिल्ने भन्दै कार्यकर्ताले होहल्ला गरेपछि कांग्रेस महासमितिको बैठक अवरुद्ध भएको छ ।

मंगलवार महासमिति बैठकको बन्दसत्र शुरू हुँदै लाग्दा सदस्यहरूले होहल्ला गरेका थिए । त्यसलगत्तै सभापति शेरबहादुर देउवा विधान संशोधन मस्यौदा आएपछि मात्र छलफल गरौँला भन्दै उठेका थिए ।

महासमिति सदस्यका तर्फबाट नुवाकोटका कांग्रेस सभापति जगदिश्वर नरसिंह केसी मञ्चको माइकमा गएर बोल्न खोजेका थिए । सभापतिको अनुमति नलिई माइकमा बोल्न खोजेको भन्दै सहमहामन्त्री डा. प्रकाशशरण महतले माइक काटिदिएका थिए । त्यसपछि महत र केसीबीच भनाभन चलेको थियो ।

बन्दसत्र स्थगित गरेर नेताहरू केन्द्रीय समितिको बैठकका लागि संसदीय दलको कार्यालयमा पुगेका छन् । आज सकिने भनिएको महासमिति बैठक एक दिन लम्बिने सम्भावना रहेको कांग्रेस स्रोतले जानकारी दियो । 

चुनावमा पार्टी पराजयको समीक्षा तथा विधान संशोधन लगायतका विषयमा छलफल गर्न कांग्रेस महासमिति बैठक शुक्रवारदेखि काठमाडौंमा जारी छ ।