काठमाडौं – सरकारद्वारा जारी ‘सहुलियतपूर्ण कर्जाका लागि व्याज अनुदान सम्बन्धी एकीकृत कार्यविधि २०७५’ अनुसार विपन्न वर्गका जनतालाई लक्षित गरी व्यवसाय तथा लघु उद्यमका लागि सहुलियत प्रदान गर्ने उद्देश्यले एनएमबी बैंकले लघु तथा विपन्न वर्ग कर्जा अन्तर्गत ‘एनएमबी सहुलियतपूर्ण कर्जा’ सञ्चालनमा ल्याएको छ ।

‘एनएमबी सहुलियतपूर्ण कर्जा’ लघुवित्तमा आधारित ८ प्रकारका व्यवसायमा लक्षित छ । जसअन्तर्गत ७ प्रकारका कर्जा विना धितो प्रदान गरिने छ ।

कर्जाहरू सहुलियतपूर्ण ब्याजदरमा बैंकले उपलब्ध गराउने छ । फलस्वरुप विपन्न वर्गका जनताको उद्यमशिलता तथा व्यवसाय विस्तार गरी दिगो आर्थिक बृद्धिमा टेवा पुग्ने विश्वास बैंकले लिएको छ ।

व्याज अनुदान अन्तर्गतका कर्जाहरु 

– एनएमबि व्यवसायिक कृषि तथा पशुपन्छी कर्जा – रु. १० लाखसम्म 

– एनएमबि शिक्षित युवा स्वरोजगार कर्जा – रु. ७ लाखसम्म

– एनएमबि वैदेशिक रोजगारीबाट फर्केका युवा परियोजना कर्जा – रु. १० लाखसम्म

– एनएमबि दलित समुदाय व्यवसाय विकास कर्जा – रु. १० लाखसम्म

– एनएमबि उच्च र प्राविधिक तथा व्यवसायिक शिक्षा कर्जा – रु. ५ लाखसम्म

– एनएमबि भूकम्प पीडितहरुको निजी आवास निर्माण कर्जा – रु. ३ लाखसम्म

– एनएमबि महिला उद्यमशीलता कर्जा – रु. १५ लाखसम्म

उल्लेखित कर्जाका अतिरिक्त कृषि पेशामा संलग्न महिलालाई लक्षित गरी एनएमबि बैंकले बैंकिङ क्षेत्रमा नौलो ‘अग्रणी महिला कृषि कर्जा’ पनि सञ्चालनमा ल्याएको छ । जसअन्तर्गत उत्पादन लागतमा आधारित रही १५ लाख रुपैयाँसम्मको कर्जा महिला कृषकले  प्राप्त गर्न सक्नेछन् ।

बैंकले निक्षेपकर्तालाई थप सुविधा प्रदान गर्ने उद्देश्यले ‘एनएमबी सहारा बचत खाता’ अन्तर्गत विभिन्न १८ वटा गम्भीर रोग, दुर्घटनाबाट मृत्यु तथा पूर्ण अशक्त भएमा अधिकतम १० लाख रुपैयाँसम्मकोे बिमा सुविधा उपलब्ध गराउने छ ।

बैंकले निक्षेप योजनामा सर्वाधिक ७% ब्याज उपलब्ध गराउने छ ।

पत्रकार सम्मेलनमा बोल्दै बैंकका प्रमुख कार्यकारी अधिकृत सुनिल केसीले भने, ‘एनएमबि बैंकले दीगो आर्थिक बृद्धि तथा मुल्य मान्यतामा आधारित बैंकिङ सेवा प्रदान गर्दै आएकोले, हरेक सेवा सुबिधा  उक्त उद्देश्य लक्षित हुने हाम्रो प्रयास रहेको छ । यसले अन्य बैंकभन्दा एनएमबि बैंकलाई फरक रुपमा प्रस्तुत गरेको छ । उपरोक्त कर्जाहरुले हाम्रा ग्राहकहरुको दिर्घकालिन आर्थिक उन्नतीमा सहयोग पुग्ने विश्वास व्यक्त गर्दछु ।’

एनएमबि बैंकलाई फाइनान्सियल टाईम्स बेलायतबाट दोस्रो पटक समेत ‘बैंक अफ द इयर’को सम्मान प्राप्त भएको व्यहोरा समेत सुनिल केसीले जानकारी गराए ।