काठमाडौं — भारतविरुद्धको चार टेस्ट शृंखलाको दोस्रो टेस्ट १४६ रनले जितेर घरेलु टोली अस्ट्रेलियाले शृंखला बराबरी गरेको छ । 

पर्थमा मंगलवार सम्पन्न खेलमा २८७ रनको लक्ष्य पछ्याएको भारत जम्मा १४० रनमा समेटियो ।

भारतलाई सस्तैमा समेट्नका लागि अस्ट्रेलियाका बलरहरू मिचेल स्टार्क र नाथन लियोनले तीन तीन विकेट लिए । बाँकी चार विकेट जोश हेजलवूड र प्याट कमिंग्सको नाममा रह्यो ।

तीव्र गतिका बलरहरूलाई सजिलो मानिने पर्थको विकेटमा भारतीय ब्याट्स्म्यानहरू खुलेर खेल्नै सकेनन् । दोस्रो इनिङमा खाता नखोल्दै विकेट गुमाएको भारतका ब्याट्स्म्यानहरू टिकेर खेल्नै सकेनन् । 

अजिंक्या रहाणे र ऋषभ पन्तले समान ३०–३० रन बनाए र त्यो नै भारतको सर्वाधिक स्कोर रह्यो । पाँच ब्याट्स्म्यानले मात्र दोहोरो अंकमा रन बनाउन सके भने तीन ब्याट्स्म्यान त शून्यमै आउट भए ।

टस जितेर ब्याटिङ गरेको अस्ट्रेलियाले मार्कस ह्यारिसको ७० र ट्राभिस हेडको ५८ रनको योगदानमा ३२६ रन बनायो । भारतका लागि इशान्त शर्माले चार विकेट हात पारे ।

जवाफमा ब्याटिङ गरेको भारतले पहिलो इनिङमा २८३ रन बनायो । कप्तान विराट कोहलीले शानदार शतक हान्दै १२३ रन बनाए भने अजिंक्या रहाणेले ५१ रनको योगदान गरे । तर अन्य ब्याट्स्म्यानले खासै रन बनाएनन् ।

नाथन लियोनले भारतका पाँच ब्याट्स्म्यानलाई पेभिलियन फर्काए ।

पहिलो इनिङमा ४३ रनको अग्रता पाएको अस्ट्रेलियाले दोस्रो इनिङमा २४३ रन बनायो । उस्मान खवाजाले ७२ र टम पेनले ३७ रनको योगदान गरे । 

भारतका लागि मोहम्मद शामीले शानदार बलिङ गर्दै ६ विकेट लिए । जसप्रीत बुमराहको नाममा तीन विकेट रह्यो ।  

दुवै इनिङमा गरी कुल आठ विकेट लिएका नाथन लियोन म्यान अफ द म्याच बने ।

शृंखलाको तेस्रो म्याच बक्सिङ डे अर्थात् अर्को हप्ताको बुधवारबाट शुरू हुनेछ ।