काठमाडौं — चिनियाँ राष्ट्रपति शी चिनफिङले मंगलवार कडा भाषण दिँदै चीनलाई यसो गर, उसो नगर नभन्न अन्य मुलुकहरूलाई चेतावनी दिएका छन् । 

‘चिनियाँहरूलाई के गर्नुपर्ने हो वा नगर्नुपर्ने हो भन्ने विषयमा बताउने स्थितिमा कोही पनि छैन,’ शीले चिनियाँ अर्थतन्त्र खुला भएको ४०औं वार्षिकोत्सव समारोहका क्रममा बताए । ‘हामीले के परिवर्तन गर्नुपर्ने हो र गर्न सकिने हो
त्यसलाई सुधार गर्नुपर्छ र परिवर्तन गर्न नसकिने कुरालाई सुधार गर्नतिर लाग्नुहुन्न ।’

शीको भाषण चीनको निर्णायक मोडको अवसरमा आएको हो । दशकौं चलेको आर्थिक वृद्धिले चीनलाई संसारको दोस्रो ठूलो अर्थतन्त्र बनाएको छ । 

सन् १९७८ को डिसेम्बर १८ मा तत्कालीन शासक देङ श्याओपिङले कम्युनिस्ट अर्थतन्त्र त्यागेर बजार अर्थतन्त्र अर्थात् चिनियाँ चरित्रको समाजवाद शुरू गरेका थिए । 

अहिले चाहिँ चीनको आर्थिक वृद्धि सुस्त छ र अमेरिकासँगको व्यापारयुद्ध जारी छ । अनि अन्तर्राष्ट्रिय समुदायले चीनको मानवअधिकार उल्लंघनका विषयमा आलोचना गरिरहेका छन् । 

अवलोकनकर्ताहरूले चिनियाँ अर्थतन्त्रलाई सुधार्न शीले नयाँ निर्देशन वा सुधारका प्रस्ताव ल्याउलान् भनी आशा गरेका थिए । चिनियाँ अर्थतन्त्र ऋणको भारीमा पिल्सिएको छ र उपभोग दर घटेको छ अनि राज्यको प्रभुत्व अर्थतन्त्रमा
बढी नै छ । 

तर शीको भाषण सत्तारूढ चिनियाँ कम्युनिस्ट पार्टीको सर्वोच्चतामा केन्द्रित रह्यो । उनले पार्टीको नेतृत्व र रणनीतिलाई प्रशंसा गरे र सरकारका उपलब्धिहरू सुनाए ।

द गार्डियनबाट