काठमाडौं — इंग्ल्यान्डको प्रभावशाली फूटबल क्लब म्यानचेस्टर युनाइटेडले व्यवस्थापक जोसे मोउरिन्होलाई बर्खास्त गरेको छ । आइतवार लिभरपूलसँगको पराजयपछि मोउरिन्होलाई हटाइएको हो । 

उनी सन् २०१६ को मे महिनामा युनाइटेडको व्यवस्थापक बनेका थिए । 

युनाइटेड यस सीजनमा अत्यन्तै खराब प्रदर्शन गर्दै शीर्ष स्थानमा रहेको लिभरपूलभन्दा १९ अंकले पछि परेको छ । क्लब शीर्ष चार स्थानमा समेत छैन । 

युनाइटेडले ६ मध्ये एक लीग म्याच मात्र जितेको छ र साउथह्याम्पटन र क्रिस्टल प्यालेस जस्ता क्लबसँग बराबरी खेलेको छ । 

मोउरिन्हो र युनाइटेडका कार्यकारी उपाध्यक्ष एड वूडवार्डको सम्बन्ध बिग्रेको देखिन्थ्यो किनकि क्लबले समर विन्डोमा सेन्ट्रल डिफेन्डर भित्र्याएन । त्यो पोजिसनमा मोउरिन्होले ल्याउन खोजेको कुनै पनि खेलाडी अहिलेको टोलीमा
रहेको खेलाडीभन्दा गतिलो नभएको क्लबको निष्कर्ष रह्यो । 

व्यवस्थापक मोउरिन्होको सम्बन्ध खेलाडीहरूसँग पनि बिग्रिएको थियो । उनले पल पोग्बालाई काराबाओ कपको खेलअघि उपकप्तान पदबाट हटाएका थिए । आफ्ना खेलाडीहरूको मानसिक अवस्था, व्यवहार र गुणस्तर राम्रो नरहेको
भनी मोउरिन्होले लगातार आलोचना गर्दै आएका थिए । 

द गार्डियनबाट