काठमाडौं – राजधानीमा घर भएका सांसदले समेत घरभाडावापत संसद सचिवालयबाट सुविधा लिएको भनेर आलोचना भएपछि संसद सचिवालयले विज्ञप्ति जारी गर्दै प्रकरणबारे धारणा सार्वजनिक गरेको छ ।

संघीय संसद सचिवालयका प्रवक्ता डा. रोजनाथ पाण्डेद्वारा हस्ताक्षरित विज्ञप्तिमा लेखिएको छ, ‘केही माननीय सदस्यहरूले काठमाडौं उपत्यकामा घर भए नभउको विवरण उपलब्ध नगराउनु भएको कारण सिर्जित समस्या समेत समाधान गरिएको छ ।’

विज्ञप्तिमा संसद सचिवालयले सांसद र आफ्नो बचाउ गर्दै सञ्चारमाध्यमको आलोचना गरेको छ । ‘सञ्चारमाध्यममा सम्प्रेषण भए जस्तो माननीय सांसदहरूलाई बढी रकम भुक्तानी नहुने र भएमा स्वतः समायोजना गरिने व्यवस्था छ,’ विज्ञप्तिमा लेखिएको छ ।

काठमाडौं उपत्यकामा घर भएका सांसदले पनि सुविधा लिएको भनेर संसद सचिवालयलाई नै उदृत गर्दै समाचार सम्प्रेषण भएको थियो । केही सांसदले आफ्नो बैंक खातामा जम्मा हुन आएको घरभाडा वापतको रकम फिर्ता गर्ने सार्वजनिक घोषणा समेत गरेका छन् ।